751 Бардыгы /

Жалал-Абад областык ооруканасына Орусиянын Башкырстан республикасынан 8 дарыгер келишти.

Аларды Башкырстан Республикасынын Саламаттыкты сактоо министринин орун басары өзү алып келди. Бул республиканын башкы пульмонологу, анестезиолог, терапевт да келген.

Бул тууралуу дарыгер-анестезилог жана реаниматолог Ильгиз Хатипов буларды билдирди.

“Кечээ биз бейтаптарды бул жердеги дарыгерлер менен кошо биринчи кароодон өткөрдүк. Дарылоо планын да талкууладык. Дарыгерлер бейтаптарды абдан жакшы дарылап жатышат экен. Биз менен келген дарыгерлер да коронавирус илдети менен күрөшүүдө тажрыйбалары чоң. Эми биргеликте дарылоо процессинде жакшы натыйжа көрсөтөбүз де ишенем”,-дейт И.Хатипов.

Анын айтуусунда максималдуу түрдө дарылоо иштерине жетишүү үчүн эки топко бөлүнүп иш алып барышууда. Алар ооруканада 5-6 күн болорун, бирок жетекчиликтин көрсөтмөсүнө ылайык иш тутушаарын билдирди.

Ал эми Жалал-Абад областык ооруканасынын директору Кумарбек Ботокараев 11 дарыгер келип, дарылоо ыкмасын үйрөтүп кеткенин жана ооруканада 8 дарыгер калганын айтат.

“Дарыгерлер кечээ келип, төрт сааттын ичинде кантип дарылоо керектигин үстүртөн үйрөтүп кетишти. Учурда бизде 8 дарыгер калды, төрт дарыгер түшкө чейин, төртөөсү түштөн кийин иштешет. Анын ичинде анестезиолог, терапевттер бар, алар биздин дарыгерлер менен тажрыйба алмашат”,-дейт К.Ботокараев.

Акылай КАРАБАЕВА, “Аймак”