1,122 Бардыгы /

Жалал-Абад облусунда эпидемиологиялык абал туруктуу аймактарда, аз сандагы окуучулар окуган мектептерде жаңы окуу жылындагы окуу салттуу түрдө уланат. Бул тууралуу редакциябызга Жалал-абад облустук билим берүү усулдук борборунун башчысы Акылбек Токтосунов билдирди.

Анын айтымында, бүгүнкү күндө жаңы окуу жылына карата даярдык толук жүрүп жатат.

“Өткөн окуу жылында облустагы 464 мектепте 235 миң окуучу менен окуу сезонун аяктаганбыз. Баарына белгилүү болгондой, өлкөдөгү кырдаалга байланыштуу 8-апрелден тарта аралыктан окутууга өткөнбүз. Учурда министрлик жаңы  2020-2021-окуу жылында окутуунун 3 процессин иштеп чыкты.

1.         Салттуу түрдө (мурдагы жылы окуу жылы кандай башталса ошондой);

2.         Аралыктан окутуу (онлайн түрдө);

3.         1-класстын окуучуларын гана мектепте салттуу окутуу боюнча.

Азыркы тапта булардын баары каралып жатат.

Ал эми биз облус боюнча окуучулардын саны аз болгон мектептердин тизмесин тактап жатабыз. Алсак, Тогуз-Тородо 9 мектеп, Базар-Коргондо 6, Кара-Көлдө 2, Чаткалда 9, Ноокенде 2 жана Таш-Көмүр шаарында 14 мектепте окуучулардын саны аз болгондугуна байланыштуу алар окутууну салттуу түрдө жүргүзүү боюнча бизге кайрылды. Учурда жергиликтүү мэрия, шаардык билим берүү бөлүмү, шаардык жугуштуу оорулардын алдын алуу борборлорунун даарыгерлери менен биргеликте мектепти текшерип окуучуларга жана мугалимдерге коопсуз экенин аныктап уруксак берилет”,-деди Акылбек Токтосунов.

Мындан сырткары ал, эгер салтту окутуу күчүнө кирсе окутууда айрым талаптар аткарылууга тийиш экенин.  Алар − санитардык-гигиеналык талапты толугу менен аткаруу, социалдык аралыкты сактоо, өздүк гигиенаны сактоо экенин кошумчалады.

Эске салсак, быйылкы окуу жылында облустагы 464 мектепке 1-класска 22миң 268 окуучу кабыл алынган. Област боюнча 464 мектеп болсо, анын 42си авариялык абалда. Ошол 42 мектептин 21инде жаңы мектептер курулууда. Ал эми жаңы окуу жылына карата облуста 329 мугалим жетишпейт.

Бүбүсара ОРОЗАЛИЕВА, “Аймак”