993 Бардыгы /

Үстүбүздөгү жылы 17-августта Базар-Коргон районунун аймагына долбоордун негизинде 837 250 сомдук гуманитардык жардам таратылды.

Аталган  райондун аймагына таркатылган гуманитардык жардам Германия Республикасынын Кыргызстандагы элчилиги тарабынан каржыланып,  долбоор “Мекеним Ала-Тоо” коомдук бирикмеси аркылуу ишке ашкан.

Район боюнча 770 адамга жардам көрсөтүлгөн. Анын жарымы аз камсыз болгон үй-бүлөлөр болсо, калганы мүмкүнчүлүгү чектелген жарандар  болгон.

Калкты азык менен камсыздоо үчүн долбоор жазган “Мекеним Ала-Тоо” коомдук бирикмесинин төрагасы Давлет Арзыкулов төмөнкүлөрдү билдирди.

“Германия Республикасынын өлкөбүздөгү элчилиги 10 000 еврого чейинки долбоорлорго жардам беребиз деп өз сайтына жайгаштырган. Карантин маалында тамак-аш, медициналык каражаттар тартыш болгондуктан ушул багытта долбоорлорду кабыл алышкан.  Бул долбоорду карантин маалында Туралы Тиленбаев экөөбүз жазып, апрель-май айларында даярдаганбыз. Биздин долбоорду авгуттун башында колдошту.  Анын натыйжасында районго ушундай суммада гуманитардык жардам көрсөтүлүүдө. Бир адамга күнүмдүк турмушта колдонулуучу алты түрдүү нерсе салынган. Анын жалпы наркы 1090 сомду түздү”,-дейт Д.Арзыкулов.

Анын айтымында аталган жардамды райондук администрация башчысы- аким Бакыт Козуев өзү айыл өкмөттөргө бөлүштүргөн. Андан ары райондук социалдык өнүктүрүү башкармалыгы жарандардын тизмесин тактаган.

 Гуцманитардык жардам райондук мамлекеттик администрациянын алдында, райондук социалдык өнүктүрүү башкармалыгынын кызматкерлери, айыл башчыларынын көмөгү астында бөлүштүрүлүп, тиешелүү жерлерге жеткирилген.

Бир адамга ылайыкталган азык-түлүк пакетинде 10 килограм ун, 5 килограм макарон, 3 литр май, 1 кило ак кант, 6 даана самын, 1 таңгак кара чай салынган.

Эске сала кетсек, Базар-Коргон районунда 9 айыл өкмөт жана 58 айыл бар.

Акылай КАРАБАЕВА, “Аймак”