804 Бардыгы /

10-августта Фергана шаарында Сох районунун 23 жаштагы тургуну Давлатжон Маллаевдин кармалганы белгилүү болду. Ал 31-майда өзбек-кыргыз чек арасындагы жаңжал учурунда облус башчысы Шухрат Ганиевге “күч колдонууга” айыпталууда.

Сох анклавындагы Чечме айлында чыккан чыр учурунда окуя болгон жерге келген облус башчысына жегиликтүү тургундар чабуул жасап, таш менен урушкан.

Давлатжон Маллаевдин апасы Насимахон Маллаева уулу бул окуядан бир нече күн өткөн соң шаарга кеткенин, ошол бойдон үйүнө кайтып келбегенин тастыктады.

“Уулум Ферганага машинесин сатуу үчүн барган. Бирок аны ал жерден кармап, камап коюшуптур”, – деди ал.

Давлатжон Маллаевдин иши 11-августта Фергана шаардык сотунда каралган. Ага “Жапырт башаламандыкка катышуу”, “Бийлик өкүлүнө каршылык көрсөтүү” беренелери боюнча кылмыш иши козголгон.

Соттун аныктамасында Давлатжон Маллаев жапырт башаламандыкка активдүү катышып, окуя болгон жерге келген укук коргоо органдарынын кызматкерлерине жана Фергана облусунун башчысы Шухрат Ганиевге күч колдонуп, аларга жана алардын автоунааларына таш ыргытканы айтылат.

Сот Давлатжон Маллаевди Фергана облусундагы №10 тергөө абагында жөнөткөн. Документте ал камакта канча убакытка чейин болору айтылган эмес.

31-майда Кадамжай районунун Бирлик айыл аймагынын Чечме айылынын тургундары менен Өзбекстандын Сох районунун Чашма айылынын тургундарынын ортосунда чыр-чатак катталып, бири-бирине таш ыргытышкан. Чыр эки тарап Чечме айылындагы булакты бирге тазалап жатканда “булак бизге таандык” деген сөз талаштан чыккан.

Расмий маалыматтар боюнча жаңжалга эки тараптан миңден ашуун киши катышкан. Күбөлөр тополоң учурунда төрт миңдей киши топтолгонун билдиришкен.

Өзбекстан жаңжалдан кийин 187 киши ар кыл жаракат менен ооруканага кайрылганын, алардын үчөөнө ок жаңылганын кабарлаган. Кыргызстандын Саламаттык сактоо миинстрлиги кыргыз тараптан 25 адам жабыркаганын, алардын ичинен төртөө оор абалда ооруканага жеткирилгенин маалымдаган.

“Азаттыктын” өзбек кызматына элден келген видеолордун биринде адамдар бир кишини таш менен уруп жатканы, аны аскерлер коргоп турганы тартылган. Сохтук тургун көк көйнөкчөн киши Фергана облусунун акими Шухрат Ганиев экенин билдирген.

www.