690 Бардыгы /

Армениянын Коргоо министрлиги 6-октябрга караган түнү Тоолуу Карабакта абал салыштырмалуу тынч болгонун билдирди.

Армения Коргоо министрлигинин басма сөз катчысы Шушан Степанян “Фейсбуктагы” баракчасына: “Дүйнө коомчулугу согуштук аракеттерди токтотуу тууралуу көптөгөн чакырыктарды жасагандан кийин түндө чек арада абал салыштырмалуу тынч болду. Мындан аркы экскалация үчүн жоопкерчилик толугу менен Азербайжандын аскердик-саясий жетекчилигинде болот”, – деп жазды.

Азербайжан бийлиги өз кезегинде 27-сентябрдан бери өлгөндөрдүн жалпы саны 27ге жеткенин маалымдады. Өлкөнүн Башкы прокуратурасы: “6-октябрга карата 25 карапайым адам өлдү, 141 киши жаракат алды”, – деп белгиледи. Баку армян күчтөрү оор артиллерия менен Азербайжандын калк жыш отурукташкан аймактарын аткылаганын айтууда. Ушул тапта 370 турак жай жана 60тан ашуун жарандык объект толугу менен жараксыз болуп калды.

Тирешкен тараптар бири-бирин жай тургундарды, эл жашаган конуштарды бутага алганы үчүн күнөөлөп жатат. Түштүк Кавказда Карабак үчүн кармаш 27-сентябрда башталган.

Жикчил Тоолуу Карабак аймагынын бийлиги 4-октябрда борбор калаасы Степанакерт, анын жанындагы Шуши шаары үч күндөн бери ракетадан жана артиллериядан аткыланып жатканын, анда жай тургундардын өмүрү кыйылып, жарадарлар да бар экенин жана бир топ имарат кыйраганын билдирген.

Азербайжандын Коргоо министрлиги армян күчтөрүн «өлкөнүн экинчи ири шаары – Ганжаны ракета жана артиллерия менен бутага алып, чабуул коюп жатат» деп айыптады.

Согуш башталгандан бери 200дөн ашык адам мерт болду. Окко учкандар мындан дагы көп болушу мүмкүн, анткени Баку канча аскерин жоготкону тууралуу расмий маалымат бербей жатат.

WWW