1,050 Бардыгы /

Орусиянын президенти Владимир Путин туткундарды жана курман болгондордун сөөктөрүн алмашуу үчүн Тоолуу Карабакта согуштук аракеттерди токтотууга чакырды. Бул тууралуу Кремлдин басма сөз кызматы билдирди.

Путин мындай билдирүүсүн Азербайжандын президенти Ильхам Алиев жана Армениянын премьер-министри Никол Пашинян менен бир нече жолу телефондо сүйлөшкөндөн кийин жасады.

Мындан тышкары Орусиянын лидери Азербайжан менен Армениянын тышкы иштер министрлерин Москвага келип, орус ТИМ башчысы Сергей Лавровдун ортомчулугу менен консультацияларды өткөрүүгө чакырды.

8-октябрда Женева шаарында ЕККУнун Минск тобунун тең төрагаларынын (Орусиянын, Франциянын жана АКШнын өкүлдөрү) катышуусунда абалды турукташтыруу боюнча жыйын башталды. Ага Азербайжандын тышкы иштер министри Жейхун Байрамов да катышты.

Күн мурун Азербайжандын ТИМ башчысы ок атышуу токтобой турганын билдирген. Президент Алиев Армения аскердик бөлүктөрүн Карабактан чыгаруу графигин сунуштагандан кийин гана Минск тобу талкууну баштайт турганын айткан.

Азербайжан менен Армениянын ортосундагы Тоолуу Карабакта кырдаал 27-сентябрдан бери курчуп, атышуу уланууда. Анын кесепетинен жүздөгөн адам каза болду. Тараптар абалдын курчуп кетишине бири-бирин айыпташууда.

WWW