666 Бардыгы /

Тажикстандын Борбордук шайлоо комиссиясы (БШК) 11-октябрда өткөн президенттик шайлоонун акыркы жыйынтыктарын жарыялады.

БШКнын маалыматына караганда, шайлоого 4 миллион 238 миң 839 жаран (жалпы шайлоочулардын 85,44%) катышып, алардын 3 миллион 853 миң 987си (90,92%) өлкөнү 1992-жылдан бери башкарып келаткан Эмомали Рахмонго добуш беришкен.

Бул шайлоого 68 жаштагы Рахмондон тышкары бийликчил партиялардан чыккан, коомчулукка көп деле белгисиз төрт талапкер – Коммунисттик партиядан Абдуллоев Миродж, Социалисттик партиядан Гаффорзода Абдухалим, Агрардык партиядан Латифзода Рустам, Экономикалык реформа партиясынан Рахматзода Рустам катышкан. Расмий маалымат боюнча алар шайлоочулардын 1-3% добушун алышты.

КМШнын Парламенттер аралык ассамблеясынын байкоочулар тобу Тажикстандагы президенттик шайлоо «жогорку уюшкандыкта, улуттук мыйзамдарга жана эл аралык стандарттарга ылайык» өткөнүн билдирген.

ЕККУнун миссиясы шайлоо боюнча өз билдирүүсүн жакынкы бир жарым айда жарыялайт деп күтүлүүдө.

Өздөрүн өлкө ичиндеги жападан жалгыз оппозиция катары тааныштырган Тажикстандын социал-демократиялык партиясы бул шайлоого бойкот жарыялаган. Партиянын лидери Рахматулло Зоиров добуш берүүнүн зарылчылыгы жок экенин, эл кимди шайласа да БШК өзү камдап койгон сандарды гана жарыялай турганын айткан.

Тажикстандын улуттук альянсынын жетекчиси Мухиддин Кабири уюм буга чейин эле президенттик шайлоону мыйзамсыз деп атаганын билдирди. «Боршайком жарыялаган шайлоонун жыйынтыктары анын мыйзамсыз гана эмес, демократияга ылайык эмес болгонун далилдеди», — деди Кабири.

Оппозициялык «Группа 24» кыймылы да 11-октябрдагы президенттик шайлоонун жыйынтыктарын тааныган жок. Бул тууралуу кыймылдын лидери Сухроб Зафар «Озоди» радиосуна берген интервьюсунда билдирди.

Эмомали Рахмон 1994-жылдан бери өткөн шайлоолордун баарында жеңишке жеткен. 2016-жылы 4-февралда Тажикстандын Жогорку соту Конституцияга киргизилген өзгөртүүлөрдү мыйзамдуу деп тапкан. Ага ылайык, президент Эмомали Рахмон шайлоого чектөөсүз катышууга укук алган.

WWW