864 Бардыгы /

Өкмөттүн Жалал-Абад облусундагы ыйгарым укуктуу өкүлү болуп жаңы дайындалган Абсаттар Сыргабаев бүгүн, 19-октябрда тааныштырылды.

Жыйынга акимдер, мэрлер, айыл өкмөт башчылары, мекеме-ишканалардын өкүлдөрү катышты. Анда Абсаттар Сыргабаевди дайындоо жөнүндөгү буйрукту вице-премьер-министр Равшанбек Сабиров окуп берип, ага ийгиликтерди каалады. Ошондой эле буга чейин облус башчысы болуп иштеп келген Нурболот Мирзахмедовго ыраазычылыгын айтты. Өз кезегинде Н.Мирзахмедов да мүмкүнчүлүгү барынча иш алып барганын айтып, мекеме жетекчилерине ыраазычылыгын билдирди.

Экөөнө тең чепкен жабылып, аягында Н.Мирзахмедов иш бөлмөсүн А.Сыргабаевга тапшырып, ийгилик каалады.

Жаңы жумушка киришкен А.Сыргабаев журналисттердин ар кандай суроолоруна жооп берди. Ал жумушун коронавирус менен күрөшүүдөн баштай турганын, коомчулук үчүн эшиги ачык экенин, саламаттыгына байланыштуу бир аптадан соң ишке чыга турганын айтты.

«Өзүм кечээ гана ооруканадан чыктым. Дагы бир апта убакыт керектелет экен. Уруксат сурадым. Келерки биринчи күндөн тартып жумушумду баштайм», – деди ал.

Абсаттар Сыргабаев 2017-жылдан бери Барпы айыл аймагын башкарып келе жаткан.

“АЙМАК”