807 Бардыгы /

Пандемиядан улам чек аралар жабылганына байланыштуу Москвада борборазиялык жумушчулардын кызматтарына суроо-талап кескин жогорулады.

Москвада тигүү цехин жетектеген Георгий Третьяков өнөктөштөрү менен премиум-класстагы кийимдерди тигүү менен алектенет. Чек аралар жабылгандан кийин ишканада бул тармакта тажрыйбасы бар адистердин тартыштыгы жаралган.

«Биздин компания тажрыйбалуу мыкты адистерге муктаж болуп жатат. Пандемиядан улам жумушчу күчтүн азайышы ишмердүүлүгүбүзгө терс таасирин тийгизип жатат. Азыр Орусиянын жарандарынан тышкары Борбор Азия өлкөлөрүнүн өкүлдөрүн да караштырып жатабыз. Анткени алар жеңил өнөр жай тармагынын чеберлери», – деди Третьяков.

Светлана Саламова мигранттардын арасынан түрдүү ишканаларга жумушчуларды таап берүү менен алектенет. Анын айтымында, пандемиядан улам жумушчулар жеңил өнөр жайынга гана эмес, башка тармактарда да жетишсиз болууда. «Азыр эмгек мигранттары бардык тармактарда жетишсиз. Көчө шыпыруучулар, пол жуучулар, курьерлер, ашпозчулар, официанттар, идиш жуучулар көп керек болууда», — деди Саламова.

Өткөн жумада Москванын мэри Сергей Собянин шаарда эмгек мигранттары 40% азайганын билдирген. Ал баш калаанын тазалык кызматында убактылуу иштеген жумушчулардын жетишсиздигинен улам кышка кам көрүү үчүн аймактардан жумушчу күчтөр тартылып жатканын айткан.

WWW