2,154 Бардыгы /

БИШКЕК. АКШнын Эл аралык өнүкүтүрүү боюнча Агенттиги (USAID) Борбор Азиялык онунчу соода Форумун толугу менен онлайн түрүндө өткөрөт. Ошентип, Борбор Азияда соода жүргүзүүнү жана байланыштуулукту өнүктүрүүгө арналган бул дүйнөлүк маанилүү иш-чара үстүбүздөгү жылдын 16-20-ноябрында жүзөгө ашырылат.

Айтмакчы, быйылкы Форумдун темасы “Борбор Азия – өсүү жана гүлдөп-өнүгүү” деп аталат. Ал COVID-19 пандемиясынан кийин экономикалык калыбына келтирүү маалында Борбор Азиядагы жаңы тенденцияларды жана рыноктун реакцияларын изилдөөгө тыкыр арналат. Бул жолку беш күндүк иш-чара глобалдык жана жергиликтүү серепчилердин, новаторлордун жана эксперттердин катышуусу аркасында Zoom, Facebook жана YouTube платформаларында өткөрүлөт.

Айтмакчы, #CATF2020 форумуна акысыз www.catradeforum.org сайты аркылуу катталса болот. Ошол эле жерде толук күн тартиби жана спикерлер жөнүндө маалымат менен таанышууга болот. Катталган катышуучулар онлайн сессияларга, негизги баяндамаларга жана семинарларга дагы кошула алышат. Алар Борбор Азиядагы товар ташуу тутумуна COVID-19 таасири, туризмди калыбына келтирүү, аймактык энергетикалык рынокту оожалтуу, электрондук сооданын олуттуу көйгөйлөрү жана маанилүү мүмкүнчүлүктөрү, мамлекеттик жана жеке секторлордун ортосунда диалог, аймактардан чыгышкан аял ишкерлердин тажрыйбасы жана башка темалары боюнча кеңири талкууларга дагы катыша алышат. Мындан тышкары Форумда Казакстандан, Кыргыз Республикасынан, Тажикстандан, Түркмөнстандан жана Өзбекстандан чыккан жыйырмадан ашуун жашылча-жемиш ишканалары коңшу өлкөлөрдөн жана эл аралык өнөктөштөр менен сүйлөшүүлөрдү дагы жүргүзүшөт. Алар Бүткүл дүйнөлүк чекене соода Форумунун [www.eximexpo.kz] негизинде гана жүзөгө ашырылат.

Ошентип акыркы он жылда Борбор Азиялык соода Форуму жаңы тенденциялар жөнүндө билүү, идеяларды алмашуу, байланышты өнүктүрүү жана бизнес жүргүзүү үчүн отуздан ашуун өлкөдөн чыккан 5 миңден ашык өкмөттүк аткаминерлерди, ишкер адамдарды жана идея көтөргөн лидерлерди бириктирди. Акыркы он жылда Борбор Азия өлкөлөрүнүн ортосунда товар жүгүртүү эки эседен ашык көбөйдү жана жылына болжол менен 6 миллиард долларды түзүп олтурат.

Алишер ТОКСОНБАЕВ, өз кабарчы