1,125 Бардыгы /

ОШ. Президенттин милдетин аткаруучу жана премьер-министр Садыр Жапаров Ош облусуна жасаган иш сапарынын алкагында Ош шаарынын калкы менен дагы борбордук стадиондо бетме-бет жолугушту.

Адегенде Садыр Жапаров 2021-жылдын 10-январына белгиленген Президенттик шайлоо боюнча өзүнүн позициясын дагы ачыктап, өлкө жетекчисинин таймашына катышаарын шардана кылды.

-Президенттик шайлоонун мөөнөтүн эмне үчүн Борбордук Шайлоо комиссиясы белгиледи деген суроолор айтылууда. Жогорку Кеңеш өз убагында президенттик шайлоонун датасын белгилей алган жок. Ошондуктан бул милдет автоматтык түрдө Борбордук шайлоо комиссиясына өтпөдүбү. Негизи мыйзам чегинде БШК шайлоо күнүн белгиледи. Мен буга чейин билдиргендей, Президенттик шайлоого сөзсүз катышам! Президенттин ыйгарым укуктарын аткарып жаткан адам президенттик шайлоодо талапкер болууга укугу жок. Ошондуктан өзүмдүн ыйгарым укуктарымдын баарын мыйзам чегинде башкага өткөрүп берип, кадимки жаран катары гана катышам! – деп кошумчалады Садыр Жапаров.

Ошондой эле Садыр Жапаров шайлоо өнөктүгүндө административдик ресурстарды колдонууга таптакыр жол бербей тургандыгын абдан катуу убадалады.

-Шайлоолордогу эң жаман, элдин бөтөнчө кыжырын кайнаткан көрүнүш — бул административдик ресурс. Мен өзүм муну менен биринчилерден болуп күрөшөм! Буга дейре эч бир коррупциялык иштерге аралашкан жокмун. Тескерисинче, анын курмандыгы гана болдум. Билесиздер, элдин үнүн бийликке жеткирем деп жүрүп камалдым. Бирок, Кудай бар экен, элим бар экен, баарын орду-ордуна коюп койду. Элден айланса болот! Баарыңыздарга башымды ийип гана терең таазим этем! – деп кебин жыйынтыктады Садыр Жапаров.

Алишер ТОКСОНБАЕВ, өз кабарчы