732 Бардыгы /

Фергана облустук сотунда Сох окуясында массалык башаламандыкка катышкан деп айыпталып жаткан 22 кишинин иши боюнча экинчи отурум өттү.

Жергиликтүү активисттердин бири 16-ноябрдагы отурумда 22 соттолуучунун 20сы айыпоолорду толук четке какканын, калган экөө күнөөлөрүн жарым-жартылай гана моюндарына алышканын билдирди.

Бирок айыптоо корутундусунда 22 соттолуучунун төртөө айыптоолорду четке какканы, үчөө күнөөлөрүн жарым-жартылай, калганы толук моюндарына алышканы жазылган.

Маалыматтарга караганда, отурумга камактагы тогуз жана үй камагындагы 13 айыпталуучу катышты. Бул иш боюнча кийинки отурум 23-ноябрга белгиленди.

Соттолуучулардын баары быйыл 31-майда Кадамжайдын Чечме айылы менен Өзбекстандын Сох районунун Чашма айылынын жашоочуларынын ортосунда булак талаштан улам чыккан жаңжалда массалык башаламандыктарга катышкан деп айыпталып жатышат. Аларга «мамлекеттик кызматкерди же башка адамды кызматтык же жарандык милдетин аткаруудан баш тартууга мажбурлоо» жана «массалык башаламандык» боюнча айыптар тагылган.

Расмий билдирүүгө ылайык, башаламандыкка миңден ашык киши катышкан. Күбөлөр анда чогулгандардын саны төрт миңге жакын болгонун билдиришкен. Тараптар бири-бирин көздөй таш ыргытып, эки тараптан бир нече үй өрттөнгөн.

Өзбекстан 187 жараны ар кандай жараат алып ооруканага түшкөнүн, алардын үчөөнө мылтыктын огу тийип, бир нече турак жай өрттөлгөнүн билдирген. Күбөлөр алардын көбү өзбек аскерлеринин элди тынчытып таратуу аракети маалында жабыр тартканын айтышкан. Анда Фергана облусунун акими Шухрат Ганиев Сохко барып, эл менен жолугушуп жатканда кагылышуу болуп кеткен.

Буга аткаминердин нааразылык билдирип, көчөдө топтолгон элге кылган өктөм мамилеси себеп болгону кабарланган. Ал «беш мүнөттө үйүңөргө кирип кеткиле, болбосо мен кайтып барып Кадамжай тараптан жолду жабам» деген. Андан тышкары ачыкка чыгып кеткен аудиодо үнү Ганиевдикине окшош адам «чыр-чатактуу айылдарды Сохтун картасынан чийип салабыз» деп айткан. Облус акиминин мына ушундай мамилесинен улам анклавдын эли аны аскерлер калкалап турганына карабай ташбараңга алууга аракет кылган.

Кыргызстандын Саламаттык сактоо министрлигинин маалыматы боюнча, Сохтогу чатактан Кыргызстан тараптан 25 киши түрдүү жараат алган, эки адам оор абалда ооруканага түшкөн.

WWW