636 Бардыгы /

Үч күндөн бери дайынсыз болуп жаткан оппозициялык маанайдагы Тажикстандын социал-демократиялык партиясынын төрага орун басары Махмурод Одинаевдин туугандары милицияга сурак берип чыгышканын билдиришти.

Алардын айтымында, суракты Гиссар шаардык милиция бөлүмүнүн кызматкерлери жүргүзгөн. «Айрымдарын кое беришти, бир нече киши кармалды», — деп билдиришти алар.

Одинаев «Фейсбуктагы» баракчасы аркылуу Душанбенин мэри Рустами Эмомалиге кайрылып, президенттик сарайдын алдында нааразылык акциясын өткөрүүгө уруксат берүүнү өтүнгөндөн кийин жоголуп кеткен. Бийлик анын бул кайрылуусуна көңүл бурган эмес, бирок Одинаев социалдык түйүндөрдө өкмөттү колдогон троллдордун чабуулуна кабылган.

Тажикстандын социал-демократиялык партиясынын жетекчилиги аларда саясатчынын кайсыл жерде экендиги тууралуу маалымат жок экенин билдирди. Партия лидеринин орун басары Шокиржон Хакимовдун айтымында, Одинаев акыркы жолу ишемби күнү чоочун номур менен чалып, Гиссар милициясы туугандарын жана жакындарын кармап кеткенин айткан.

Ал ортодо өлкөнүн Ички иштер министрлигинин (ИИМ) басма сөз кызматы саясатчынын туугандары суракка алынып, кармалгандыгы тууралуу маалыматтарды четке какты.

Быйыл октярда Одинаев белгисиз адамдар уулуна кол салганын айтып чыккан. «Бийлик мындай жол менен мени жана мага окшогон бийликти сындап жүргөндөрдү коркуткусу, саясий ишмердүүлүгүбүздү токтоткусу келип жатат», — деген ал.

Бирок анда ИИМ саясатчынын уулу мас абалында ресторандагы кардарлар менен урушуп кеткенин билдирген.

WWW