612 Бардыгы /

АКШда Жалпы кызматтар боюнча федералдык башкармалыктын (GSA) башчысы Эмили Мерфи өлкөнүн шайланган президенти Жо Байден бийликти жаңы администрацияга өткөрүп берүү жараянын ишке ашыруу үчүн бөлүнгөн мамлекеттик каражат менен ресурстарды колдонсо болорун билдирди.

Бул Дональд Трамптын администрациясы 3-ноябрда өткөн президенттик шайлоонун жыйынтыктарын формалдуу түрдө алдын ала тааныган алгачкы учур. Өз кезегинде бул мамлекеттик кызматкерлер менен Жо Байдендин утурумдук командасынын маалымат алмашуусуна, Федералдык иликтөөлөр бюросуна администрациядагы негизги кызматтарга сунушталган талапкерлерди текшерүү ишин баштоого, ошондой эле бийлик алмашуу жараянына 6,3 миллион доллардын бөлүнүшүнө жол ачат.

Өз катында GSA башчысы бийликти өткөрүп берүү жараянын кийинкиге жылдыруу анын жеке чечими болгонун, Ак үй тараптан эч кандай басым болбогонун жазган. «Мен бул чечим боюнча эч кимден тапшырма алган эмесмин. Бирок мени ушундай чечим кабыл алдыртууну көздөгөндөрдөн коркутуулар болгон», – деп жазды Эмили Мерфи.

Президент Трамп Мерфинин каты боюнча «Твиттердеги» баракчасына мындай деп жазды:

«Мен өлкөбүзгө туруктуу берилгендиги жана лоялдуулугу үчүн Эмили Мерфиге ыраазычылык билдиргим келет. Аны аңдып, коркутуп, кемсинтишкен — мындай мамиленин анын жеке өзүнө, үй-бүлөсүнө жана GSA кызматкерлерине карата кайра жасалышын каалабайм».

Президент Мерфини бийликти кийинки администрацияга өткөрүп берүү жараянын баштоого байланышкан бардык эрежелерди аткарууга чакырды.

Дональд Трамп добуш берүүнүн жыйынтыктары боюнча бир катар штаттарда соттошуп жаткан чакта, Жо Байден администрациясын түзө баштады. Дүйшөмбү күнү ал өкмөттөгү негизги кызмат орундарына бир нече кишинин талапкерлигин сунуштады.

WWWW