1,008 Бардыгы /

Жанболат Агадилдин өлүмүнө байланыштуу козголгон кылмыш ишине байланыштуу шектүү катары кармалган эки жигиттин туугандары менен адвокаттары тергөөдө мыйзамсыз иштерге жол берилип жатканын айтышты. Адвокаттардын бири бул боюнча район аралык тергөө сотуна доо арыз жазды.

“Адам өлтүрүү” беренеси боюнча шектелип жаткан Өмүржан Рахметтин адвокаты Жандос Туяковдун айтымында, азыркыга чейин шектүүнүн апасы уулу менен жолугуша албай жатат.

— Алар (полиция. — ред.) апасы менен жолугуу үчүн Өмүржан кат түрүндө кайрылышы керек экенин айтышты. Биз кат жаздык. Бирок азыркыга чейин жолуктурбай жатышат, — деди ал.

Адвокат сотко кайрыларын билдирди.

“Бейбаштык” беренеси боюнча айыпталган Мадияр Сыдыктын адвокаты Нуржан Кангелдиев 25-ноябрда район аралык тергөө сотуна “тергөө учурундагы мыйзамсыз аракеттер” боюнча арыз менен кайрылган. Сот аны үч күндүн ичинде карап, жооп берүүгө тийиш.

– Катта шектүүнү полиция бөлүмүнө киргизип, адвокатсыз суракка алышканы, 24 саат тамак бербей кармап, психологиялык кысым көрсөтүшкөнү тууралуу жазылган. Ага “мойнуңга албасаң, түрмөгө камалышың мүмкүн, ойлон” деп айтышкан, – деди Нуржан Кангелдиев.

Жанболат Агадил 11-ноябрга караган түнү Нур-Султандын Көктал кичи районунда өлтүрүлгөн. Полиция ал топ балдардын мушташына катышып, ошол жерден бычак жегенин билдирген.

Маркумдун атасы, казакстандык активист Дулат Агадил быйыл 24-февралда кармалып, бир күндөн кийин тергөө абагында көз жумган. Полиция активисттин жүрөгү кармаганын кабарлаган. Казакстандагы бир катар укук коргоочулар, оппозициячыл саясатчылар жана активисттер Агадил өз ажалынан өлгөнүнөн күмөн санап келишет.

Дулат Агадил Казакстандагы орчундуу жана көйгөйлүү саясий, социалдык, экономикалык маселелерди ачык айтып, акцияларга чыккан оппозициячыл активист катары белгилүү болчу.

WWW