1,614 Бардыгы /

  Аксыдагы киши өлтүрүү фактысынын бети ачылды. Бул тууралуу Жалал-Абад ОИИБдин басма сөз кызматы билдирди.

Маалыматка ылайык, РИИБге 2020-жылдын 24-ноябрь күнү саат 18:30 чамасында Аксы районунун 56 жаштагы тургуну телефон чалып, Кербен шаарында жашаган К.Ж. аттуу карындашын (1971-жылы туулган) белгисиз бирөө чачыктуу жолук менен муунтуп өлтүргөндүгүн кабарлаган.

Маалымат боюнча РИИБдин жетекчилиги жана тергөө-ыкчам тобу окуя болгон жерге чыгып, кароо жүргүзүлүп, сүрөт таблицалар түзүлүп, тиешелүү материалдар чогултулган. Топтолгон материалдар Кылмыштардын жана жоруктардын бирдиктүү реестрине Жазык кодексинин 130-беренеси (Киши өлтүрүү) менен катталып, сотко чейинки өндүрүш иши башталып, тиешелүү экспертизалар дайындалган.

Жансыз денеге сырттан кароо жүргүзүү учурунда анын башында уюган кандын калдыктары жана жанчылып жарылгандан кийинки жарааты, ошондой эле мойнунда көгөргөн издер байкалган.

«Жалал-Абад ОИИБдин жана Аксы РИИБдин жетекчилигинин көзөмөлү астында аталган оор кылмыштын бетин изин суутпай ачуу максатында, тийиштүү кызматкерлерге кылмышты жасаган адамды аныктоо жана башка күбөлөрдү тактоо боюнча тергөө тапшырмалары берилип, тергөө-ыкчам иш-чаралары жүргүзүлгөн.

Жалал-Абад ОИИБдин уюшкан кылмыштуулукка каршы күрөшүү бөлүмүнүн жана Аксы РИИБдин криминалдык милиция кызматынын кызматкерлери тарабынан жүргүзүлгөн ыкчам-иликтөө иштеринин натыйжасында, 26-ноябрь күнү Ош облусунун 1982-жылы туулган тургуну Т.Ф. Ош шаарында убактылуу жашап жаткан батиринен кармалды.

Тергөөнүн жүрүшүндө Т.Ф. Аксы районунун тургуну К.Ж.ны өлтүрүп, анын алтын буюмдарын, кол телефонун алып, андан кийин Ала-Бука районуна барып, ошол жерден таксиге отуруп, Ош шаарына баргандыгы белгилүү болгон. Ал жактан алган алтын буюмдарын жана кол телефонун сатып, Ош шаарында ижарага батир алган. Андан кийин эч жакка чыкпай, эч ким менен байланышпай, жашырынып жаткандыгы жана керектүү нерселерди такси кызматы аркылуу алдырып жашап тургандыгы аныкталды.
Жактоочунун катышуусунда Т.Ф. суракка алынып, кылмышты жасагандыгы боюнча күнөөсүн мойнуна алган. Ошондой эле, болгон окуя боюнча толугу менен көрсөтмө берди

Шектүүгө карата ЖПКнин 98-беренесинин негизинде кабарлама берилип, убактылуу кармоочу жайга киргизилди.

Учурда бул кылмыш ишинин алкагында тергөө иштери уланууда», – деп айтылат маалыматта.

“АЙМАК”