708 Бардыгы /

Орусиянын президенти Владимир Путин ЖККУнун курамындагы өлкөлөрдүн башчыларын Армениянын премьер-министри Никол Пашинянды колдоого чакырды.

Бул тууралуу орус президенти аталган уюмдун 2-декабрдагы онлайн жыйынында билдирди. Ал Тоолуу Карабактагы куралдуу кагылышууну токтотуу боюнча Азербайжан, Армения жана Орусия кол койгон үч тараптуу келишимге комментарий берип жатып, армян премьери мындай жүрөк ооруткан, бирок зарыл болгон кадамга барууга мажбур болгонун айтты.

«Жыйынга катышып жаткан ар бир адам мындай чечимди кабыл алуудагы жоопкерчилик деңгээлин түшүнүп турса керек. Ал (Пашинян) бул жоопкерчиликти өзүнө алды. Биздин милдетибиз – премьер-министрди жана анын командасын колдоо аркылуу тынчтыкты камсыз кылуу, кабыл алынган чечимдердин ишке ашышын камсыз кылуу жана кыйын абалга туш болгон адамдарга жардам берүү», – деди Владимир Путин.

Никол Пашинян болсо үч тараптуу келишимдин негизинде орус күчтөрүнүн тынчтык орнотуучу катары жайгаштырылышын «аймактагы коопсуздуктун кепилдиги» деп билдирди.

Ал кан төгүүнү токтотууда Путиндин ролу чоң болгонун кошумчалады.

Тоолуу Карабактагы куралдуу кагылыш Азербайжандын, Армениянын жана Орусиянын жетекчилери 10-ноябрда атышууну толук токтотуу тууралуу кол койгон келишимден кийин басылган. Келишимге ылайык, Азербайжан уруш маалында өз көзөмөлүнө алган Тоолуу Карабактагы жана анын айланасындагы жерлерди башкарып калат. Аймактагы коопсуздукту сактоого 2000ге жакын ашуун орусиялык бейпилдик күчтөрү көмөктөшөт.

Тоолуу Карабактагы чатакты токтотуу боюнча келишимге кол койгон соң армян коомунун бир бөлүгү, анын ичинде оппозиция премьер-министр Никол Пашиняндын өкмөтүн катуу сынга алган. Ереванда бир нече күн бою Пашинянды кызматтан кетирүүнү талап кылган акциялар өтүп, анын жүрүшүндө бир катар оппозициячыл саясатчылар камакка алынган.

WWW