714 Бардыгы /

Тажикстандын мурдагы башкы прокурору Бобожон Бобохоновдун уулу Фируз Бобохонов өлкөнүн башкы көзөмөл органында жаңы кызматка дайындалды. Бул тууралуу «Озоди» радиосу өз булактарына шилтеме кылып билдирди.

Маалыматка караганда, Бобохонов Түзөтүү абактарында мыйзамдын сакталышын көзөмөлдөө бөлүмүн жетектейт. Ал буга чейин 11 жыл прокуратура органдарында эмгектенген — Душанбедеги Сино районунун прокурору жана Башкы прокуратуранын тергөөчүсү болуп иштеген.

Бобожон Бобохонов башкы прокурор кызматынан 2010-жылы алынган. Анын тушунда Согди облусунун мурдагы башчысы Абдужалил Хомиов, президенттик гвардиянын экс-командири Гаффор Мирзоев, мурдагы ички иштер министри Якуб Салимов жана «Тажикгаз» мамлекеттик компаниясынын экс-директору Махмадрузи Искандаров узак мөөнөттөргө соттолушкан.

2011-жылы Бобохоновдун Гиссар райондук прокуратурасын жетектеген дагы бир уулу Файзулло Бобохонов жети жылга эркинен ажыратылган. Ага пара талап кылуу, кызмат абалын кыянат пайдалануу беренелери боюнча айып тагылган. Ал эркиндикке 2013-жылы чыккан.

WWW