795 Бардыгы /

Арменияда ишембиде премьер-министр Никол Пашиняндын кызматтан кетишин талап кылган каршылык акциялары өттү. Анда миңдеген адамдар алгач Еревандагы Эркиндик аянтына чогулуп, андан ары Пашинян жашаган өкмөттүк дачага барышты.

Акция учурунда АРФД партиясынын өкүлү Ишхан Сагателян оппозиция Пашинянга отставкага кетүү үчүн 8-декабрга чейин убакыт бергенин билдирди.

– Шейшемби күнү саат 12ге чейин биз Никол Пашинянга убакыт беребиз. Ал саясий командасы, кеңешчилери менен талкуу өткөрүп, отставка боюнча акыркы чечимди кабыл алышы керек. Никол [Пашинян], бул сенин өкмөттүк дачада жашап жаткан акыркы сааттарың болот. Бизде бир гана талап бар – Никол кызматтан кетиши керек, точка!, – деди Ишхан Сагателян.

Оппозиция Тоолуу Карабактагы 44 күндүк согушка байланыштуу кырдаал үчүн Пашинянды күнөөлүү деп эсептейт. Алардын айтымында, эгер премьер отставкага кетпесе, бүткүл өлкө боюнча жарандык баш ийбөөчүлүк акциялары уюштурулат.

Никол Пашиняндын отставкасын баш-аягы 17 партия талап кылып жатат жана алар “Ата Мекенди коргоо” кыймылына биригишкен. Бул кыймыл өкмөт башчылыкка “Улуттук-демократиялык бирикме” партиясынын лидери Вазген Манкуяндын талапкерлигин көрсөткөн.

Оппозиция билдиргендей, Вазген Манкуян премьер-министр болгондон кийин дароо партиялык ишмердүүлүгүн токтотуп, парламенттик шайлоого катышпоого жана анын жыйынтыгы чыккандан кийин өкмөт башчылыкка умтулбоого сөз берет. Ошол эле маалда ал бир жылдан кийин мөөнөтүнөн мурда парламенттик шайлоо өткөрүүгө милдеттенме алат.

Вазген Манукян митингдин катышуучуларына кайрылып жатып, Пашинян өз ыктыяры менен кетпесе, аны бул кадамга барууга аргасыз кыла турушканын билдирди.

Арменияда Никол Пашинян Тоолуу Карабактагы согушту токтотуу боюнча Азербайжан жана Орусия менен үч тараптуу келишимге кол койгондон бери каршылык акциялары өтүп жатат. Макулдашууну көпчүлүк армяндар Еревандын утулушу катары кабыл алган.

Үч тараптуу келишимге ылайык, Азербайжан 1990-жылдардын башына чейин өзү көзөмөлдөгөн аймактарды эле эмес, дагы бир катар райондорду, анын ичинде Карабактын байыркы борбору Шуша шаарын да алды.

Ок атууну токтоткон келишимдин дагы бир шарты боюнча Орусия 2 миңге жакын аскерин Тоолуу Карабакта тынчтык орнотуучу катары киргизген. Алар ушул тапта Арменияны Карабактын жикчил бөлүгү менен байланыштырып турган Лачын өткөөлүн да кайтарып жатат.

WWW