1,404 Бардыгы /

БАТКЕН. Баткен шаардык мэриясы Айыл Банк аркылуу лизингге, шаарды көрктөндүрүү, жашылдандыруу жана  тазалыгын сактоо максатында жалпы суммасы 16 миллион   сомдук  5 атайын техникаларды сатып алды.

Ошентип, Кытай мамлекетинен чыгарылган ХОВО үлгүсүндөгү 3 таштанды ташуучу, 1 суу чачуучу, 1 бийиктиктеги жумуштарды жасоочу автоунаалар, шаардын муниципалдык менчик ишканасынын балансына өткөрүлүп берилди. Кыргыз Өкмөтүнүн Баткен облусундагы ыйгарым укуктуу Өкүлү Жаныбек Жалалов, Баткен шаар мэри Мамыржан Рахимов, Айыл Банк ААКнун башкаруучусунун орун басары Бакыт Асанбаев айдоочуларга автоунаалардын ачкычтарын тапшырышты. Белгилей кетчү жагдай: буга чейин Баткен шаардык мэриясынын “Тазалык” ишканасынын балансында, эскилиги жеткен 4 техника болуп, шаардын тазалыгын сактоодо көйгөйлөрдү жараткан. Мындан улам аталган ишкананын материалдык базасын чыңдоо үчүн жаңы техникалар алынып келинди. Жаңы тапшырылган техникалар Баткен шаарынын 30 миңге жакын калкын, 6400 кожолукту туруктуу тейлейт.

Алишер ТОКСОНБАЕВ “АЙМАК”