897 Бардыгы /

ОШ. Ош облусунун бардык райондорунда автоунаалардын кышка даярдыгы абдан дыкаат текшерилип жатат. Бул жөнүндө Ош облусунун жол кыймылынын коопсуздугун камсыздоо бөлүмүнүн басма сөз катчысы Алтынбек Таңгизбаев маалымдады.

Ош облусунун жол кыймылынын коопсуздугун камсыздоо бөлүмүнүн басма сөз катчысы Алтынбек Таңгизбаевдинайтымында, 2020-жылдын 27-ноябрь күнү Кара-Суу, Ноокат жана Араван райондук жол кыймылынын коопсуздугун камсыздоо бөлүмчөлөрүнүн кызматкерлери тарабынан райондордун борборунда жайгашкан автобекеттерде жүргүнчүлөрдү ташуу менен алектенген автоунаалардын айдоочулары, район, шаар, облус аралык жана республика борборуна жүргүнчүдөрдү ташыган такси кызматын аркалаган автоунаалардын айдоочулары арасында жол кыймылынын эрежелерин сактоо багытында түшүндүрүү  иштерин күчөтүштү.

ЖКККБ кызматкерлери айдоочулар менен жолугушуу маалында өлкө аймагындагы Эл аралык маанидеги автожолдордун абалы, азыркы учурдагы аба ырайы кескин түрдө өзгөрүп, жолдор тайгак болуп жаткандыгы боюнча маалымат беришти. Андан тышкары айдоочуларга автоунаалардын жайкы дөңгөлөктөрүн кышкыга сөзсүз алмаштыруу, алыскы сапарга чыгарда автоунаалардын техникалык абалына өзгөчө көңүл бурууну катуу эскертишти.

Баса, Ош облусунун аймагында 2020-жылдын өткөн он бир айында жалпысынан 555 жол-транспорт кырсыгы катталып, мунун кесепетинен 117 жаран каза таап, 842 жаран ар түрдүү даражада жаракат алышкан.

Алишер ТОКСОНБАЕВ “АЙМАК”