762 Бардыгы /

Москвадагы “Театр.doc” театрында “Неформат” аттуу даректүү спектаклдын премьерасы болду. Мында Борбор Азия менен Орусиянын улуттук республикаларынан келген актерлор ойношту.

“Неформат” биринчи кезекте ксенофобия жөнүндөгү чыгарма. Андагы бардык окуяларды актерлор өз баштарынан өткөрүшкөн. Бири балдардын кебетеси азиялык болгону үчүн мектепте буллингге кабылганы, бири аралаш никедеги жана өзүнүн ким экендигин аныктоодогу көйгөйлөрдү айтып берген. Ар бир окуя оргиналдуу болгону менен бардык актерлорду жалпы бир көйгөй бириктирип турат: ал – Орусияга мүнөздүү эмес кебете үчүн кинодо татыктуу роль алуунун мүмкүн эместиги.

“Бул жерде улуттук тема же улутчулдук темасы көтөрүлүүдө. Бул жерде иденттүүлүк жана иденттүүлүктү издөө темасы көтөрүлүп жатат деп айтсак болот, – деди спектаклдин режиссеру Анастасия Патлай.

Сахнадагы актерлор көчө шыпыргыч, куруучу жана башка экинчи пландагы ролдор аларды анчалык шыктандырбай жатканын белгилешет. Каармандар бул сыяктуу ролдорду аткарган күндө да продюсерлер арзыбаган гонорар сунушташарын, муну менен көп жылдык тажырыйбасы бар актерлорго кор мамиле жасаларына даттанышкан.

“Менин тибимдеги актерлор орус киноматографы үчүн белгилүү бир форматта бар десек болот. Эгер ал мен болсом, анда чыгыш аялдарын, өзбектерди жана башкаларды ойнойм. Спектаклдин башында бул тууралуу айтылган, бул маселе болгон, бар жана боло берет окшойт”, – деп түшүндүрдү актриса Наргис Абдулаева.

“Неформат”спектаклинде кишилердеги сабатсыздык жана стереотиптер шылдыңга алынган.

Белгилүү актер, маркум Болот Бейшалиевдин уулу Азиз Бейшеналиев: “Настя ар бирибиз менен бир нече саат бою диктофон коюп алып, баарлашып чыкты. Албетте, анын баарын спектаклге алып чыгуу мүмкүн эмес. Ошондуктан Настя өзү кандайдыр бир фрагменттерди тандап, бул спектаклдин пазлын чогулткан”, – деп эскерет.

“Үстүртөдөн эмес, өтө жеке учурлар бар, башкача айтканда ал жерде мен апам, атам менен сүйлөшө албаган темалар камтылган”, – деди актриса Феруза Рузиева.

“Театр.doc” даректүү оюндарга багытталган. Бул жерде көрүүчүлөр өзүлөрүнө тааныш көйгөйлөрдү адаттан тыш форматта көрө алышат. Спектаклдер интервьюга, күбөлөрдүн баяндарына жана чыныгы кишилердин тагдырларына негизделет.

WWW