921 Бардыгы /

АКШнын бийлиги COVID-19га каршы вакцинага шашылыш түрдө уруксат берүүгө даярданып жатат. 8-декабрга карата жарыяланган маалыматтарга ылайык, өлкөдө коронавирус жуктургандардын саны 15 миллион кишиден ашты.

Өлкөнүн Дары-дармектерди көзөмөлдөө кызматы 10-декабрга белгиленген жыйынынын алдында Pfizer жана BioNTech компаниялары иштеп чыккан вакцинанын коопсуз экендиги тууралуу документтерди алды. Жыйындын жүрүшүндө аталган вакцинага шашылыш түрдө уруксат берүү-бербөө маселесин талкуулоо пландалып жатат. Саламаттык сактоо тармагынын өкүлдөрү препаратка уруксат берилет деп болжолдошууда.

8-декабрда Улуу Британия батыш өлкөлөрүнүн ичинен биринчилерден болуп Pfizer жана BioNTech вакциналарын колдонуу менен массалык эмдөө иштерин баштаган. Өлкө бийлиги алгач 80 жаштан жогору кары-картаңдар, карылар үйлөрүндө жашап жаткандар, дарыгерлер жана социалдык кызматкерлер эмделет деп аныктаган. Эмдөө милдеттүү эмес, каалаган адамдар гана алышат.

Кошмо Штаттар коронавирустан каза болгондор көбөйүп жаткан шартта калкты эмдөөнү баштоого аракет кылууда. Өлкөдө суткасына эки миңге жакын киши өлүп, ооруканаларда бейтаптар көп болууда.

WWW