732 Бардыгы /

БАТКЕН. Баткен облусунда 12-декабрь адабият күнүнө карата Кыргыз Өкмөтүнүн Баткен облусундагы ыйгарым укуктуу Өкүлүнүн колдоосу аркасында Апаз Жайнаков атындагы Баткен облустук музыкалык-драма театры жана Баткен облустук китепканасы тарабынан китепти көркөм окуу сынагы  уюштурулду.

Аталган сынакка жалпы жонунан жетимиштен ашуун китеп сүйүүчү жаштар, анан дагы мектеп окуучулары активдүү катышышты. Ошентип, проза жанрындагы Чыңгыз Айтматовдун “Балалыгым”  чыгармасы  боюнча  тестте,  48 окурман ыраса күч сынашты. Жыйынтыгында Сүлүктү шаарынын мектеп окуучусу Момунова Нуриза биринчи орунду ээледи.  Ал эми поэзия жанры боюнча көркөм окууга  22 окурман катышып, жыйынтыгында Баткен облустук гимназия жатак мектебинин окуучусу  Абдиразак кызы Кулпунай 1-орунду камсыз этти. Жеңүүчүлөргө 1-2-3-даражадагы дипломдор, залкар жазуучу Чыңгыз Айтматовдун 10 томдугу, ошондой эле таанымал акын-жазуучулардын адабий  китептери кошо ыйгарылды.

Аталган иш чара Кыргыздын залкар жазуучусу Чыңгыз Айтматовдун туулган күнүнүн, 12-декабрь адабият күнүнүн урматына жана китепкөй жаштардын катарын көбөйтүү, алардын  китепке болгон кызыгуусун арттыруу, шыктандыруу максатында гана уюштурулду.

Сынактын соңунда көрөрмандарга Апаз Жайнаков атындагы Баткен облустук музыкалык-драма театрынын артисттери тарабынан Чыңгыз Айтматовдун чыгармаларынын негизинде сахналаштырылган театралдык композиция дагы тартууланды.

Алишер ТОКСОНБАЕВ “АЙМАК”