831 Бардыгы /

Бухара шаарынын прокурору Жасур Фозилов соцтармактар аркылуу президент Шавкат Мирзиёевге кайрылуу жасап, башкы прокурор Нигматилла Юлдашевди аймактагы коррупциялык иштерге тиешеси бар деп айыптады.

Ал: “мен биздин башкы прокурор жана анын үч кызматкери жасаган кылмыштар жөнүндө айткым келет” деп, башкы прокурорду кызмат абалын кыянаттык менен пайдаланууга күнөөлөдү.

Фозилов бул кайрылууну жасоону чечкенден кийин ага каршы кызматтык териштирүү башталганын билдирди.

Фозилов 10 миллиард сум салык төлөөдө качуу фактысы боюнча жергиликтүү фирмалардын бирине кылмыш иши ачылганын, анын жетекчисин башкы прокурор өзү калкалап жүргөнүн айтууда. Прокурордун билдиришинче, фирма арам акчаны адалдоо менен алектенет.

Фозилов башкы прокурор “Мега Бухара” соода борборунун курулушуна да түздөн-түз катышканын, ал жерде коррупциялык иштерге жол берилгенин кошумчалаган.

Өзбекстандын Башкы прокуратурасы Жасур Фозиловдун айыптоолорун иликтөөгө жана териштирүүнүн жүрүшүндө коомдук көзөмөлдү камсыздоого даяр экенин билдирди.

Өз кезегинде Башкы прокуратура бухаралык бизнесмендин арызынын негизинде Жасур Фозиловго карата кызматтык териштирүү башталганын маалымдады. Маалыматка караганда, Фозилов ишкерди ири соода борборундагы дүкөнүн кысым менен арзан баада сатууга мажбурлаган.

Бул факты боюнча Жасур Фозилов 2-декабрда кызматынан убактылуу четтетилген.

WWW