Аймак

КЫРГЫЗ РЕСПУБЛИКАСЫНЫН ПРЕЗИДЕНТИНИН МИЛДЕТИН АТКАРУУЧУ, ЖОГОРКУ КЕҢЕШТИН ТӨРАГАСЫ ТАЛАНТ МАМЫТОВ МАДАНИЯТ-ЖАЛАЛ-АБАД АВТОЖОЛУНУН КУРУЛУШ ИШТЕРИНИН ЖҮРҮШҮ МЕНЕН ТААНЫШТЫ

КЫРГЫЗ РЕСПУБЛИКАСЫНЫН ПРЕЗИДЕНТИНИН МИЛДЕТИН АТКАРУУЧУ, ЖОГОРКУ КЕҢЕШТИН ТӨРАГАСЫ ТАЛАНТ МАМЫТОВ МАДАНИЯТ-ЖАЛАЛ-АБАД АВТОЖОЛУНУН КУРУЛУШ ИШТЕРИНИН ЖҮРҮШҮ МЕНЕН ТААНЫШТЫ

 609 Бардыгы /

Кыргыз Республикасынын Президентинин милдетин аткаруучу, Жогорку Кеңештин Төрагасы Талант Мамытов, бүгүн, 20-декабрда Жалал-Абад облусуна болгон жумушчу сапарынын алкагында Маданият-Жалал-Абад автожолунун курулуш иштеринин жүрүшү менен таанышты.

Транспорт жана жолдор министри Бакыт Бердалиев билдиргендей, долбоорго асты 9 см жана үстү 6 см болгон асфальтбетон катмарынан турган экинчи категориядагы 67 кмлик жолду төшөө, ошондой эле 181 түтүктүн жана 9 көпүрөнүн курулушу кирет.

«Келишимге ылайык, курулуш иштери аяктаган соң жол төмөнкү техникалык параметрлерге ээ болмокчу:

— калктуу конуштарда 4 тилке, калктуу конуштардан тышкары 2 тилке;

— жол тилкесинин туурасы — 3,5 — 3,75 м;

— салмагы 11,5 тонна октук басымга эсептелген;

— калктуу конуштарда тротуарларды жасалгалоо, жарыктандыруучу жана дренаждык лотокторду орнотуу;

— аялдамалардын эскисин оңдоп-түзөө, жаңыларын орнотуу;

— жаңы бак-дарактарды отургузуу.

2020-жылдын ичинде казуу иштерин 78%га бүтүрүү, 15 км узундукта асфальтбетон төшөө жана 1 кмлик жол боюна дренаждык түтүктөрдү орнотуу пландаштырылган. Учурда пландаштырылган иштин бардыгы жүзөгө ашырылды», — деп баса белгиледи Бакыт Бердалиев.

Президенттин милдетин аткаруучу Талант Мамытов транспорттук коридорлордун өлкө үчүн өзгөчө мааниси бар экендигин, Кыргызстан бийик тоолуу өлкө болгондуктан, 90% га жакын аймагы деңиз деңгээлинен 1500 метрден ашык бийиктикте жайгашкандыктан транспорттук артериялардын басымдуу түрү — автожолдор болуп саналарын белгиледи.

«Стратегиялык трассалар өлкөнүн бардык облустарын бириктирип турат жана бир катар чет мамлекеттердин ортосундагы жол коридорунун бөлүктөрү болуп саналат. Бул Кыргызстандын экономикасын өнүктүрүүгө чоң салым кошуп, миллиондогон адамдардын жашоо-тиричилигине кызмат кылат», — деп айтты Мамлекет башчысы.

Ал Маданият-Жалал-Абад автожол бөлүгүнүн курулушу Бишкек-Ош автожолун реконструкциялоо долбоорунун бир бөлүгү экенин, өз кезегинде транспорттук коридорлорду өркүндөтүү боюнча Борбор Азия аймактык экономикалык кызматташуунун (БААЭК-3) ири долбоорлорунун бири болуп саналарын белгилеп өттү.

Президенттин милдетин аткаруучу Талант Мамытов БААЭК-3 долбоорун ишке ашыруу калктын кызмат көрсөтүүлөргө, товарларга жана базарларга жеткиликтүүлүгүн жогорулатып, аймактагы өлкөлөрдүн ортосундагы байланышты бекемдеп жана ошондой эле кыймылдын бардык катышуучулары үчүн коопсуздукту жакшырта турганын, бул өз кезегинде экономикалык өсүштү жогорулатып, аймактык кызматташууну жана интеграцияны активдештире турганын кошумчалады

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17