672 Бардыгы /

2021-жылдын 10-январында өтүүчү Кыргыз Республикасынын Президентин шайлоого даярдык көрүү жана өткөрүү багытында Жалал-Абад ОИИБи тарабынан профилактикалык иштер жүргүзүлүүдө. Бул маалыматты Жалал-Абад ОИИБдин Басма сөз кызматы ырастады.

Сузак райондук жана Майлуу-Суу шаардык ички иштер бөлүмдөрү тарабынан мергенчилик сүйүүчүлөр жана куралы бар каттоодо турган атуулдар текшерүүгө алынууда. Милиция кызматкерлери курал-жарактардын сакталуу жайларына, алардын тиешелүү документ иштерине көзөмөл кылып жатышат.

Ошондой эле эл арасында мыйзамсыз сакталган курал-жарактарды өз ыктыяры менен тапшыруу боюнча түшүндүрүү иштери жүргүзүлүүдө.

Ал эми Чаткал РИИБи тарабынан шайлоого байланыштуу добуш берүү тилкелериндеги коопсуздук эрежелери текшерилди. Район аймагындагы Ак-Таш, Курулуш, Жаңы-Базар жана Айгыржал участкаларынын коопсуздугу көзөмөлгө алынып, шайлоо участогундагы кызматкерлер менен маектешүүлөр орун алды. Добуш берүү учурундагы тынчтыкты сактоо жана ар кандай провакациялык чакырыктардын алдын алуу маселеси талкууланды.

Байканбек САДЫКОВ “АЙМАК”