1,308 Бардыгы /

Шайлоо күнү Жалал-Абад облусунда 700дөн ашуун медицина кызматкери нөөмөттө болушат. Ал эми облуста 80 тез жардам кызматы күчөтүлгөн тартипте иштейт. Бул тууралуу шайлоону өткөрүү боюнча түзүлгөн штабдын төрагасы Ы.Ызабеков “Аймак” редакциясына билдирди.
Анын айтымында шайлоочуларды тейлөө үчүн 898 оператор атайын окуудан өткөн, ушул тапта даярдыктар текшерилүүдө.
“Өлкөбүз эгемендүүлүк алган жылдан тарта экинчи ирээт кыш чилдеде шайлоо өтүп жатат, андыктан жылуулукка өзгөчө маани берилүүдө. Шайлоо участкаларынын басымдуусу мектептердин спорт залдарында жана маданият сарайларында орун алган. Көпчүлүк шайлоо участкаларындагы көмүр жетиштүү, буйруса жылуулук толук кандуу болот. Мындан сырткары ошол күнү облус аймагында 177 дарыгер жана 553 мед айым нөөмөттө болот. Алар шайлоочулардын ден-соолугуна көз салып турушат. Октябрь айында өткөн парламенттик шайлоодой эле, аралыкты сактоо, бир жолку колдонулуучу бет кап жана кол каптар таркатылып, илдетти жугузуп албоо эрежелери так сакталат -деди Ы.Ызабеков.
Белгилей кетсек, Жалал-Абад облусунда 449 шайлоо участкасы бар, анда 666миң 556 шайлоочу өз добуштарын берет. Бул парламенттик шайлоодо катталган шайлоочулардан 23 миңге көп.

WWW