1,419 Бардыгы /

БИШКЕК. Кыргызстандагы бардык шайлоо тилкелеринин 83 пайызы ден соолугунан мүмкүнчүлүгү чектелгендердин шартына карап заманбап пандустар менен жабдылды. Бул жөнүндө БШКнын төрайымы Нуржан Шайлдабекова кабарлады.

Маалыматка таянсак, ушул жылдын 10-январында мөөнөтүнөн мурда Президенттик шайлоону жана Мамлекеттик Башкаруу тартибин аныктаган референдумду өткөрүүнүн алкагында ден соолугунан мүмкүнчүлүгү чектелген шайлоочулардын керектөө картасы дээрлик жаңыланып, аларга заманбап шарттар түзүлдү.

Айтмакчы, 2017-жылкы Президенттик шайлоодо шайлоо тилкелеринин үчтөн бирине гана пандус орнотулган эле. Ал эми өткөн жылдын февраль айында пандустар менен жабдылган шайлоо тилкелери 43 пайызга, августта 65 пайызга, сентябрда 79 пайызга, ал эми декабрда 83,4 пайызга жеткендиги тастыкталды.

Ошентип, БШКнын төрайымы Нуржан Шайлдабекова тастыктагандай, өлкөбүздөгү 185 шайлоо тилкесинде пандуска дээрлик муктаждык жок. Ал эми 215 шайлоо тилкесинде атайын жабдуу орнотула элек, учурда добуш берүүчү жайда шайлоочуларга толук кандуу шарт түзүү жумуштары дагы токтой элек.

Алишер ТОКСОНБАЕВ “АЙМАК”