Аймак

ААЛАМДЫК МАСШАБДАГЫ ОЙЧУЛ ЖАЗУУЧГА АРНАЛГАН ИШ-ЧАРА

ААЛАМДЫК МАСШАБДАГЫ  ОЙЧУЛ ЖАЗУУЧГА  АРНАЛГАН ИШ-ЧАРА

 2,334 Бардыгы /

  Жакында Ош шаарында Кыргыз Эл жазуучусу Кубатбек Жусубалиевдин 80 жылдык мааракесине жана анын чыгармачылыгына арналган кайрымдуулук кечеси болуп өттү. Ага Ош шаарынын мэри Таалайбек Сарыбашов,  КР  Өкмөтүнүн  Ош облусундагы ыйгарым укуктуу өкүлүнүн орун басары  Бактыбек Алайчиев  жана жазуучунун калемдештери, шакирттери, жакын санаалаштары жана туугандары катышты.

  Келген коноктор  жазуучунун өмүр баянына жана анын чыгармачылыгына арналган видеотасма жана  Ош облустук китепканасы  тарабынан китеп көргөзмө  менен таанышты.

  Шаардын жана облустун жетекчилери  Кыргыз Эл жазуучусунун кутман курагы менен куттукташып, анын чыгармалары  терең  философияга  каныккандыгын белгилеп, анын эли үчүн жасаган эмгеги баа жеткис байлык экендигин белгилеп өтүштү.

  Жазуучунун достору жана жакындары Кубатбек Жусубалиевдин жаш кезинен тартып эле китепке өтө  кызыккан өспүрүм болгондугун,  студент кезинен тартып орус жана чет өлкөлүк жазуучуларын чыгармалары менен тааныша баштагандыгы, жарык көргөн китептеринин каармандары катардагы карапайым айыл адамдары экендиги  тууралуу кызыктуу маалыматтарды кошумчалашты.

 Жазуучунун замандаштары Кубатбек Жусубалиевдин жубайы, белгилүү актриса жана кинорежиссер, Кыргыз Республикасынын маданиятына эмгек сиңирген ишкер   маркум Клара Юсупжанованы эскеришип, чыгармачылык үй бүлөдөн таалим-тарбия алган Франциядан билим алган белгилүү публицист, профессор Жамбү Жусубалиеванын дарегине да жылуу сөздөрүн айтышты. 

 Кубатбек Жусубалиев  азыркы учурда  жалпы адамзат, анын болочок тагдырын, анын келечегин  аныктоодогу   адам баласынын руханий дүйнөсү  тууралуу ааламдык масшабда ой жүгүрткөн ойчул экендигин, анын бул максатта  кытайлык Жусуп Мамайга жана Далай Ламага жолуккандыгын  белгилеп кетишти.

Салтанат катышкандар жазуучунун жарык көрө чыгармаларын бастыруу үчүн топтолуп жаткан каражатка өз салымдарын кошушту. 

Бул иш-чарага катышкандарга  Кыргыз Республикасынын маданиятынын эмгек сиңирген ишмери, төкмө Абдибали Акимбеков,   Кыргыз опера жана балет театрынын белгилүү ырчысы Заира Раимбекова,  Улуттук консерваториянын Бакыт Акибаев жетектеген квартет, белгилүү кыл кыякчы Бакыт  Чытырбаев, Индиялык ырчы бийчилер  өз өнөрлөрүн тартуулашты.  

Кийинки күнү Кыргыз Эл жазуучусунун чыгармачылыгына  арналган  илимий иш–чара   Ош мамлекеттик университетинде  улантылып, окуу жайдын окумуштуулары,  сырттан чакырылган  илимпоз, адабиятчылар Кубатбек Жусубалиевдин аңгеме, повесть, романдарына  ар тараптуу талдоо жүргүзүү менен, анын  чыгармалары кыргыз адабиятында  башкалардан айрымаланып  турган, жаңы ыкма, жаңы  агым  менен жаралгандыгын белгилеп өтүштү.  Алардын айтуусунда Кубатбек Жусубалиев – адабиятта  башкалардан айрымаланып турган, өзгөчөлүккө ээ, өзүнө гана таандык чыйыры бар  жазуучу.

  Иш-чаранын аягында Кыргыз Эл жазуучусу Кубатбек Жусубалиев өзү жөнөкөй адам экендигин, жөнөкөй адам мындай сый-урматка чын дилинен кубана тургандыгын белгилеп, иш-чаранын уюштуруучуларына  өтө ыраазы  болгондугун  билдирди.

 Төлөнбай АБДЫРАЗАКОВ, “АЙМАК”

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17