693 Бардыгы /

Human Rights Watch (HRW) эл аралык укук коргоо уюму Тажикстандын бийлигин экстремизм айыбы менен жети жылга соттолгон 80 жаштагы карыя Дониёр (Дона) Набиевди тез арада эркиндикке чыгарууга чакырды.

Набиевди 2020-жылы декабрдын аягында Душанбенин Исмоили Сомони райондук соту өлкөдө тыюу салынган «Ислам кайра жаралуу» партиясынын камактагы мүчөлөрүнө «материалдык жардам көрсөткөнү үчүн» жети жылга эркинен ажыраткан.

Карыянын жакындары ал кургак учук менен ооруй турганын, акыркы айларда оорусу күчөп жатканын билдиришүүдө. Абакта дарыланууга шарттар жок болгондуктан, алар өкүмдү кайра карап чыгуу өтүнүчү менен Жогорку сотко кайрылышкан.

HRW уюмунун 20-январда жарыяланган билдирүүсүндө Дониёр Набиев кайрымдуулук иштерди жасаганы үчүн соттолгону белгиленген. «Ал Ислам кайра жаралуу партиясынын камактагы мүчөлөрүнүн жакындарына өзү акча топтоп, 15-30 доллардан берген», — деп жазылган билдирүүдө.

Уюм Набиевге кылмыш иши саясий негиздер менен козголгон деп эсептейт.

Буга чейин Тажикстандын Ички иштер министрлиги (ИИМ) Нобиев «үчүнчү өлкөлөр аркылуу кээ бир мамлекеттердин атайын кызматтары бөлгөн каражатты алып, экстремисттик идеяларды таратуу, ошондой мазмундагы адабият сатып алуу, жаштарды жихадчы топторго тартуу үчүн коротконун» билдирген.

Былтыр БУУнун жумушчу тобу партиянын кээ бир мүчөлөрүнүн иштеринде кылмыш болбогонун айтып, аларды бошотууга үндөгөн. Душанбе бул чакырыкты көз жаздымда калтырган.

WWW