1,014 Бардыгы /

 БИШКЕК. Анкара Эл аралык кинофестивалында  режиссёр Ибадылла  Ажибаевдин «Мугалим» даректүү тасмасы баш байгени  жеңип алды. Сыйлоо аземи Бишкек шаарындагы Чыңгыз Айтматов атындагы кино үйүндө жүрдү.

Маанилүү иш-чарага Маданият, маалымат жана туризм министри Нуржигит Кадырбеков катышып,  ал эми баш байгени Түрк мамлекеттер Кенешинин Генералдык катчысынын орун басары, Кыргыз Эл жазуучусу Султан Раев тапшырды. Министр Нуржигит Кадырбеков жеңүүчүлөрдү чын ыкластан куттуктап жатып, кино ишмерлерине чыгармачылык ийгилик гана тилеп, Кыргыз киносунун өнүгүп-өсүшүнө жана аны дүйнө жүзүнө даңазалоого мындан ары дагы барлык аракеттер көрүлөөрүн убадалады. Ошондой эле салтанатка акыркы эки ай аралыгында Эл аралык деңгээлдеги кинофестивалдарга Кыргызстандын атынан катышкан лауреаттар дагы  катышып, учурдагы Кыргыз киносунун кенлдирди кескен көйгөйлөрү кең-кесири талкууланды.

Айтмакчы, “Акыркы көч” толук метраждуу көркөм тасмасы Дакка шаарындагы Эл аралык кинофестивалдын “Мыкты фильми” номинациясынын жеңүүчүсү болду.  Тасманы Төлөмүш Океев атындагы Улуттук “Кыргызфильм” киностудиясы жана “Билимкана” коомдук фонду биргелешип тартышкан. Режиссёрлор – Бакыт Мукул жана Дастан Жапар уулу. Ал эми, “Шамбала” толук метраждуу көркөм тасмасынын режиссеру, Кыргыз  Эл артисти Артык Сүйүндүков Калькуттадагы 26-Эл аралык кинофестивалынын “Эн мыкты режиссура” сыйлыгына татыды. Ошондой эле “Мурас” даректүү тасмасы Америкада өткөрүлгөн Эл аралык “The Hollywood Awards” кинофестивалынын “Эң мыкты даректүү тасма” сыйлыгына арзыды. Режиссёру – Турсунбек уулу Илгиз-Шернияз.

Алишер ТОКСОНБАЕВ “АЙМАК”