1,002 Бардыгы /

ОШ. Медиа жана маалыматтык сабаттуулукту жайылтуу боюнча Ош шаарындагы мугалимдерден куралган чыгармачыл топ соңку тапта көптөгөн иш-аракеттерди жүргүзүп келатат. Аталган топ акыркы кезде бир катар окууларды дагы уюштуруп, өздөрү дагы республикалык жана эл аралык деңгээлдеги түрдүү семинар жана башка иш-чараларга жигердүү катышышууда.

Ушуга улай аталган топ мектептик медиа борборлорду дагы түзүшүп, социалдык желелерде байма-бай жарыялап келатат. Келечек муундарга заманбап шартты эске алуу менен туура жол көрсөтүп, окуу менен тарбияны айкалыштырып иштеп келген бул мугалимдер татыктуу эс алууну дагы  кадимкидей салтка айландырышкан. Маселен, Ош шаарынын ичинде белгилүү даталарда майрамдык иш-чара уюштурушуп, мезгил-мезгили менен табият койнуна дагы моминтип эс алууга чыгышат. Бул ирет Алай жергесиндеги айтылуу «Чыйырчык» кышкы эс алуучу жайында табияттын кооз кучагында маданияттуу эс алууга үлгүрүштү.

Баса, бул туурасында редакциябызга кабарлаган Тынчтыкбек Досмуратов мындай эс алуулар мугалимдердин чыгармачылык ийгилигине дагы түздөн-түз таасирин тийгизет деген бекем ишеничте экендигин жашырган жок.  Алар бул жолку дем алышты чыгармачыл топтун ичиндеги алайлык мугалимдер уюштуруп, медиа жана маалыматтык сабаттуулукка байланыштуу кызыктуу Программалар менен коштолду. Тактап айтканда, табият койнунда сүрөткө түшүү учурунда туура сүрөткө тартуу, аны илгиртпей монтаждоо жана «сториске» жайгаштыруунун таасирдүү ыкмаларын дагы кенен-чонон бөлүшүштү.

Ошентип, эмгек менен эс алууну туруктуу айкалыштырып келаткан бул чыгармачыл топ жаз айларында айтылуу Баткендин Айгүл-Тоосуна баш багып, аерде дагы ыраса сейилдөөнү пландап жатат.

Алишер ТОКСОНБАЕВ “АЙМАК”