1,248 Бардыгы /

БАТКЕН. Баткен облусунун Кадамжай районунда жергиликтүү бийлик, эмгек жана  социалдык өнүгүү башкармалыгынын, укук коргоо органдарынын кызматкерлеринен турган атайын комиссия үймө-үй кыдырып, олуттуу социалдык көйгөйлөргө дуушарланган учурларды аныктоо иш-чарасын жүргүзүүдө.

         Балдарга карата ырайымсыз мамилелердин, зордук-зомбулуктун жана укук бузуулардын алдын алуу максатында, ата-эненин камкордугусуз калышкан, ички жана тышкы миграцияда жүргөн жарандардын балдарын тактоо иштери дагыле ыраттуу жүрүп жатат. Үймө-үй кыдыруу иштеринин жыйынтыгы аркасында миграцияда жүргөн үй-бүлөлөрдүн, ата-энеси миграцияда жүргөн балдардын, турмуштук оор кырдаалга кабылган үй-бүлө жана балдардын, зордук-зомбулукка кабылган балдардын саны такталып, тобокел топко кирген үй бүлөлөр мындан ары адистердин такай көзөмөлүнө алынмакчы.    

Айтмакчы, Кадамжай районунда 2019-жылда ата энеси миграцияда жүргөн балдардын саны 7435 болгон болсо, 2020-жылдын жыйынтыгы менен  5047 баланын ата-энеси миграцияда экендиги ырасталды. Мындай үймө-үй кыдыруу өнөктүгү Баткен облусунун бардык район-шаарларында улантылууда.

Алишер ТОКСОНБАЕВ “АЙМАК”