597 Бардыгы /

БАТКЕН. Баткен облусунун Баткен, Кызыл-Кыя, Сүлүктү  жана  Исфана  шаарларында калкы ичилүүчү таза суу менен камсыздоо жана канализацияларды реаблитациялоо боюнча мерчемделген ири долбоорлор жүзөгө ашырылууда.  

         Баткен шаарында Европа  реконструкциялоо жана өнүктүрүү Банкы  тарабынан жалпы суммасы 5020 миң евро долбоору  жактырылган. Мунун  алкагында  Таза суу ишканасы үчүн керектүү техникалар жана жабдуулар сатып алынып, Таза суу ишканасынын имараты курулуп дагы бүткөрүлгөн. Ошондой эле Чет-Булак тилкесинде сыйымдуулугу 1000 м3 болгон суу кампасы курулуп бүттү. Ушул тапта суу эсептегичтер орнотулуп, 2021-жылдын май айына дейре долбоордун биринчи этабында белгиленген  2000 кожолукка толугу менен ичүүчу суу берилүүсү күтүлүүдө.   

Кызыл-Кыя шаарында  жалпы наркы 7 миллион 200 миң еврону чапчыган ЕРӨБ тарабынан каржыланган долбоор аткарылууда. Шаардын аймагындагы он алты көчөгө суу түтүктөрүн жаткыруу, суу кудуктарын орнотуу иштери бүткөрүлүп,  үч көчөнүн жумуштары 80 пайызга  аткарылып, долбоордун бирнчи этабы аяктоо алдында турат.

Сүлүктү шаарында жалпы узундугу 45,9 чакырымды түзгөн таза суу куурларын жаткыруу, траншеяларды казуу иштери боюнча долбоор Бүткүл дүйнөлүк банкы тарабынан жактырылып, долбоордун наркы 4 миллион  АКШ долларды түзгөн. Ушул тапта долбоордун биринчи этабы  дээрлик 100 пайызга аткарылып, 2020-жылдын декабрь айында “Сүлүктү-Таза-Суу канал” муниципалдык ишканасынын баласына өткөрүлүп берилди. Учурда 1500 кожолукка таза суу берилди. Долбоордун экинчи этабы март айында башталмакчы.  

Ал эми Исфана шаарында Европа өнүктүрүү Банкы тарабынан каржыланып, жалпы  сметасы беш миллион еврону түзгөн долбоор башталган. Бүгүнкү күндө курулуш иштерин жүргүзүү үчүн техникаларды сатып алуу аракеттери көрүлүүдө. 2021-жылдын апрель айында жумуштар башталаары күтүлүүдө. Натыйжада Исфана шаары жана Чымген, Голбо айылдары толугу менен таза суу менен камсыз этилет.

Ал эми 2026-жылга чейин мерчемделген Кыргыз

Республикасынын калктуу конуштарын ичилүүчү суу менен камсыздоо жана саркынды сууларды чыгаруу системаларын өнүктүрүү Программасынын алкагында кошумча Кадамжай жана Айдаркен шаарларын дагы таза суу менен камсыздоо иш чарасы кабыл алынып, тиешелүү жумуштар аткарылууда.

Алишер ТОКСОНБАЕВ “АЙМАК”