1,749 Бардыгы /

БАТКЕН. Кыргыз Өкмөтүнүн Баткен облусундагы ыйгарым укуктуу Өкүлчүлүгүнө 300гө жакын Баткен районунун тургундары Төрт-Гүл каналынын тагдырына тынчызданып, нааразычылыгын айтып келишти.  Булар менен Кыргыз Өкмөтүнүн Баткен облусундагы ыйгарым укуктуу Өкүлү  Жаныбек Жалалов жолугушуп, алардын суроо-талаптарын тыңдады.

Жергиликтүү калк Кыргыз Республикасынын Премьер-министри Улукбек Мариповдун Төрт-Гүл каналы боюнча айткан сөзүнө катуу кабатырланышып, Баткен облусу үчүн өзгөчө маанилүү суу обьектиси жөнүндө так жана биржаңсыл жооп алуу үчүн келишкендигин ачыкташты. Кыргыз Өкмөтүнүн Баткен облусундагы ыйгарым укуктуу Өкүлү  Жаныбек Жалалов чогулгандарга  Төрт-Гүл суу сактагычы жана Төрт-Гүл каналы боюнча кең-кесири маалымат берип, бул суу обьекттери Кыргызстанга гана тийиштүү жана биздин аймакта жайгашкандыгын баса белгилеп, тынчсызданууга негиз жок экендигин айтты. Ал эми Өкмөт башчынын дарегине айтылган элдин талаптары Кыргыз Республикасынын Премьер-министри Улукбек Мариповго түз жеткирилээрин убадалады. Ошондой эле башкы суу бөлүштүрүүчү жайдагы суу бөлүштүрүү 1991-жылкы мамлекеттер аралык келишимге ылайык бөлүштүрүлүп келе жаткандыгына токтолуп, ушул тапта Баткен облусунун дагы калкынын саны өсүп, өздөштүрүлгөн жер аянттары кеңейип жаткандыктан, бул келишимди кайра кароо боюнча Өкмөттөр аралык комиссияга сунуштар берилип келгендигин жашырган жок.

• Узундугу  дээрлик он тогуз чакырымга созулган Төрт-Гүл каналы –  

Баткен районунун Ак-Сай Айыл Өкмөтүндө жайгашкан башкы суу бөлүштүрүүчү жайы Кыргызстанга гана тийиштүү, аталган каналдын башы, башкы суу бөлүштүрүүчү жай, стратегиялык өзгөчө маанилүү обьект болгондуктан, Кыргызстандын ички аскерлери тарабынан  күнү-түнү кайтарылып турат. Бул обьект башка мамлекеттиин карамагына өтүп кетүүсү мүмкүн эмес жана ага жол берилбейт! – деди Кыргыз Өкмөтүнүн Баткен облусундагы ыйгарым укуктуу Өкүлү  Жаныбек Жалалов.

         Баткен облусунун башчысы ошондой эле чек аралаш аймактын элинин коопсуз, бакубат жашоосу үчүн мамлекеттик колдоо мындан ары дагы ырааттуу улантылаарын жана делимитация-демаркация маселелери, чек аралаш аймактын активдеринен түзүлгөн комиссия, жергиликтүү эл менен биргеликте, ачык-айкын каралып, макулдашуу жана тынчтык жолу менен гана чечилээрин убадалады.  

Алишер ТОКСОНБАЕВ “АЙМАК”