846 Бардыгы /

Шинжаңда камакта отурган жакындарын бошотууну талап кылган жарандар Кытайдын Алматыдагы консулдугунун алдына пикетке чыгышты.

Акцияга жакындарынын сүрөттөрүн көтөрүп чыккан Фарида Кабылбек, Гүлнур Косдаулеткызы жана Нурзат Ермекбай «Кытайдагы геноцидди токтотууну» талап кылышты.

— Кытай үй-бүлөлөрдү багуучусунан ажыраткан, балдарды тирүүлөй жетим кылган геноцид саясатын токтотсун. «Лагерлер» жабылып, камактагы мусулмандар, анын ичинде күйөөм бошотулсун», — деди Косдаулеткызы.

Фарида Кабылбектин айтымында, анын күйөөсү 2017-жылдан бери Кытайданчыга албай келет.

— Аны негизсиз кармап, «тыңчы» деген айып менен 13 жылга камашты. Бул аз келгенсип «саясий лагерге» бир жарым жылга жөнөтүштү. Азыр ал үй камагында. Эмнеге аны кое бербей жатышат? Казакстанга келүүсүнө уруксат беришсин», — деди Кабылбек.

Акциянын дагы бир катышуучусу Нурзат Ермекбай Кытайда калган бир тууганынын тагдыры тууралуу маалымат алууга аракет кылып жүргөнүн билдирди.

Өткөн жумада КытайдынАлматыдагы консулдугунун алдына Байболат Кунболатулы аттуу жаран акцияга чыгып, Шинжаңдагы жакыны тууралуу маалымат берүүнү талап кылган. Аны полиция кызматкерлери кармап кеткен. Сот «Тынч жыйындарды өткөрүү эрежесин бузууга» күнөөлүү деп таап,эскертүү берген. Сотто Кунболатулы айыптоолорду четке каккан.

Кытайда 1,5 миллионго жакын казак жашайт. Алардын көбү өлкөнүн түндүк-батышындагы Шинжаң аймагына отурукташкан. Бул аймакта уйгурлар, казактар жана кыргыздар сыяктуу жергиликтүү мусулман коомчулугунун жүз миңдеген өкүлү атайын «лагерлерде» негизсиз кармалып турганы 2017-жылдан бери кабарланып келет. 2018-жылы Бириккен Улуттар Уюму Шинжаңдагы «лагерлерде» бир миллионго жакын уйгур жана башка аз улут өкүлдөрү бар экенин билдирген. Айрым маалыматтар боюнча камактагылар өз дининен, маданиятынан жана тилинен баш тартууга мажбурланышат.

Кытай бийлиги мындай жайларды экстремизмге, терроризмге каршы күрөштүн алкагындагы «тарбиялоочу, кесипке үйрөтүүчү жайлар» катары сыпаттайт жана куугунтук тууралуу дооматтарды четке кагып келет.

WWW