687 Бардыгы /

БАТКЕН. Баткен облусунун саламаттыкты сактоо тармагы өткөн жылдын жыйынтыгын чыгарды. Облуста 2020-жылы жугуштуу оорулар (бруцеллез оорусун эске албаганда) эки эсеге азайган. Буга элдин таажы илдетине байланыштуу өздүк гигиенаны жана санитардык талаптарды сактоосу себепкер болгон. Ал эми жугуштуу эмес, кант диабети, жүрөк кан тамыр жана башкар оорулар жылдан жылга көбөйүп гана баратат. Адистер мунун себебин элдин сергек жашоого жана туура тамактанууга анчалык маани бербей жаткандыгы менен түшүндүрүшүүдө. 

         Калкка медициналык кызмат көрсөтүүнү бара-бара жакшыртуу жана саламаттыкты сактоо мекемелеринин материалдык-техникалык жактан камсыздоо максатында республикалык бюджеттин жана инвесторлордун колдоосу аркасында Баткен районунун  Кара-Булак, Сай, Ак-Сай айылында, Кадамжай районунун Адыр, Өндүрүш, Чекелик, Ак-Кыя, Сухана айылында ФАП курулуп, пайдаланууга тапшырылды. Мындан тышкары Баткен облустук үй-бүлөлүк дарыгерлер борборунун эски имараты капиталдык оңдоп-түзөөдөн өткөрүлүп, жугуштуу оорулар бөлүмү катары кайрадан ишке тапшырылды. Муну менен катар Кадамжай районунун Үч-Коргон айылынын жалпы дарыгерлер бөлүмүнө караштуу балдар бөлүмү жана дарылоо консультативдик бөлүмүнүн  курулушу бүткөрүлдү. Ушул тапта оорукананын эки кабаты курулуп, чатыры дагы жабылды.

Ал эми Кадамжай районунда Өзбекстан республикасынын колдоосу аркасында 200 орунга ылайыкташкан жеңил конструкциядагы бейтапкана дээрлик курулуп бүттү. Мындан башка дагы Лейлек районунун Коргон айылында жана Баткен районунун Орто-Боз айылында үй-бүлөлүк дарыгерлер тобунун имараттары курулуп, пайдаланууга тапшырылды. Саламаттыкты сактоо тармагынын тез жардам кызматынын ишин илгерилетүү максатында, Самаркандек айылына тез жардам бөлүмүнө имарат курулуп, облуска мамлекет тарабынан он үч, демөөрчүлөр тарабынан тогуз тез жардам унаалары берилген. Ошондой эле санавиация кызматын күчөтүү максатында жалгыз  реанимобиль  унаасы дагы тартууланды.

Баткен жергесинде саламаттыкты сактоо тармагын санариптештирүүнүн алкагында, онлайн кезеке туруу, онлайн каттоо кызматтары дагы ишке киришти. Белгилей кетсек, өткөн жыл аралыгында  медийина тармагына 93 медицина кызматкери  жаңы келген. Булардын 21и –  жаңы бүтүрүүчүлөр. Жыл ичинде дагы 44 дарыгер мамлекеттик депозит программасына  тартылган. Бирок, Баткен облусунда дагы деле 75 дарыгер тайкыс бойдон калууда.

Алишер ТОКСОНБАЕВ “АЙМАК”