897 Бардыгы /

ЖАЛАЛ-АБАД. Жалал-Абад шаарынын 2021-жылга карата бюджети коомдук угууда кызуу талкууланды. Ага калаа башчысы Эрнисбек Ормоков, шаардык Кеңештин төрагасы Адилбек Жоробаев, мекеме-ишканалардын жетекчилери жана шаар тургундары катышышты.

Коомдук талкууда Жалал-Абад шаарынын быйылкыга бюджети тууралуу кенен-чонон маалымат берилип, бул жылга пландалып жаткан иштердин долбоору дагы тааныштырылды. Бюджеттин басымдуу бөлүгү курулуш тармагына бөлүнүп, бир катар ири долбоорлор ишке ашырылмакчы. Мэр Эрнисбек Ормоков бул өңүттө өзү дагы кенен баяндама жасады.

Жалал-Абад шаарынын мэри Эрнисбек Ормоков баса белгилегендей, Спутник кичи шаарчасындагы Нооруз сейил багы оңдоп-түзөөдөн өткөрүлүп, ага 45 миллион сом акча каражаты каралууда. Кыска убакытта муниципалдык унаа базары дагы ишке тапшырылып, муну үчүн 10 миллион сом сарпталат. Курулуш маркетинин жанына муниципалдык базар ачылып, буга улай борбордук базарды көчүрүү иштери жүргүзүлөт. Анын имаратынын үстүн жабууга 15 миллион сом, жаңы базар уюштурууга 10 миллион сом жумшалат.

Мындан тышкары Төш-Кутчу айылына 100 орундуу бала бакча курулуп, Некрасов жана Жуматаев көчөлөрүндөгү бала бакчалар капиталдык ремонттон өткөрүлөт. Шаардагы борбордук Курманбек стадионуна эки спорт аянтчасы курулуп, №2 мектептин спорт сарайынын курулушу аягына чыгарылат. Буга улай көчөлөргө асфальт төшөө, тротуар куруу, жолдорду жамап-жасоо иштери, бир катар мекемелердин имаратын оңдоп түзөөдөн өткөрүү мерчемделген.Быйыл шаардык жол башкармалыгына 14 миллион сомдон ашуун суммага асфальт чыгаруучу завод салынат. Ал саатына 40 тонна асфальт чыгарып, көчөлөргө асфальт төшөөдөгү бир катар көйгөйлөргө чекит коюлат.

Ал эми Жалал-Абад шаарына жаңылык киргизүүчү иштер дагы жасалат. Бак-дарактарды, гүлдөрдү тамчылатып сугаруу ыкмасына өтөт. Мүмкүнчүлүгү чектелген жарандар үчүн машыгуу залын уюштуруу, шаарга келген туристтерге маалымат берүүчү борборду ачуу дагы негизги пландардын бири болуп саналат. Бюджеттик угууга катышкан шаардыктар долбоорлорду колдоого алуу менен катар өздөрүнүн ой-пикирлерин билдиришти. Шаар башчысына көйгөйлөрү боюнча суроолорду узатышып, жеринде жетекчилерге тапшырмалар дагы берилди. Мында көтөрүлгөн сын-сунуштар эске алынып, эми шаардык Кеңештин кезектеги сессиясында каралат.

Алишер ТОКСОНБАЕВ “АЙМАК”