582 Бардыгы /

Хатлон облусунун Хуросон районунда селден жабыркап, былтыр май айында бийликтин кайдыгерлигине наарзы болуп каршылык акциясына чыккан он киши жазага тартылды. Алар 17-майда бир нече саатка Бохтар -Душанбе жолун жабышкан.

Соттун чечимине ылайык, акциянын катышуучуларынын бешөө бейбаштыкка айыпталып, бир жарым жылдан түрмөгө кесилди. Дагы бешөө, анын ичинде үч аял 515 доллардан айып пул төлөөгө милдеттендирилди. Бул тууралуу Тажикстандын Жогорку соту билдирди. Өкүм былтыр 26-ноябрда чыккан жана эми мыйзамдуу түрдө күчүнө кирди.

14-16 майда Хуросон районундагы селден эки киши каза болуп, ондогон турак-үй зыянга учураган. Райондук өзгөчө кырдаалдар бөлүмү 14 үй толугу менен жарабай калганын айткан.

17-майда ондогон адам нааразылык акциясына чыгып, Бохтар-Душанбе унаа жолун тосушкан. Алар мындай жол менен аткаминерлердин көңүлүн селден кийин жаралган көйгөйлөргө бурууга аракет кылышканын билдиришкен. Анда акцияга чыккандарды милиция кызматкерлери кууп таркатышкан. Он киши 5-10 суткага камалган. Июнь айында алты кишиге кылмыш иши козголгону кабарланган.

WWW