792 Бардыгы /

Өкмөттүн Жалал-Абад облусундагы ыйгарым укуктуу өкүлүнүн биринчи орун басары Мамасалы Акматов Ала-Бука районунун чек ара маселелери жаралган аймагына барды.

Анда райондун Көк-Серек айыл аймагындагы Кош-Болот айылынын Кара-Белес тилкесиндеги кыргыз-өзбек чек ара бөлүгүндө болуп, жергиликтүү тургундар менен жолукту. Ага областтык ички иштер башкармалыгынын, чек ара кызматынын башчылары, “Кадастр” мамлекеттик мекемесинин райондук филиалынын жетекчиси жана жергиликтүү бийлик өкүлдөрү катышты.

Облус башчысынын орун басары жашоочуларды коңшу өлкө менен чектешкен аймагындагы талашка түшкөн тилке буга чейин такталганын, тийиштүү иш жүргүзүү боюнча тараптар ортосунда сүйлөшүүлөр болгонун айтты. Чек араны тактоо иштеринин алкагында ошол эле Кара-Белес тилкесинен 61 гектардан ашуун жер аянты Кыргызстандын аймагына өткөрүлгөнүн белгилеп, жергиликтүүлөргө түшүндүрүү иштерин жүргүздү.

Ала-Бука районунун Кош-Болот, Кара-Белес жана Көк-Серек жерлеринде делимитацияланган мамлекеттик чек ара 2017-жылдын 5-сентябрындагы кыргыз-өзбек мамлекеттик чек арасы жөнүндө эки өлкөнүн келишимине жана 2017-жылдын 2-октябрында ратификацияланган №173  мыйзамына ылайык аныкталган.

“АЙМАК”