2,091 Бардыгы /

    Кыргызстандагы эң жапжаш акимдердин бири – Алай райондук мамлекеттик акимчилигинин башчысы Алтынбек БОЛБУР уулу. Кызматына жаңыдан гана киришкен тоолуу аймактын 42 жаштагы жетекчиси улан-кыздарды Ош шаарына атайын апкелип, спорттук түрдүү мелдештерге катыштырып жүргөн жеринен капыл-тапыл кепке тарттык.

• Алтынбек мырза, адегенде жаңы кызматыңыз кут болсун! Баса,

бул абдан жооптуу мансапка Сиз кантип дайындалып калдыңыз, ыя? Мен билгенден Алай районунун акимдигине далайы буту үзүлгөнчө жүгүрүшүп, тилекке каршы, жетпей калышпадыбы…

• Алай районуна караштуу Гүлчө Айыл Өкмөтүнүн башчысы элем. Аз

күн мурда Президентибиз Садыр Жапаров өзү чалып, Бишкекке атайын аңгемелешүүгө чакырып, “Ар түрдүү булактардан сурамжыладым. Абдан таза иштеп келатыпсыз. Эң башкысы: артыңыздан жаман сөз ээрчитпепсиз. Акыл калчап олтуруп, акырында Сизди Алай районунун акимдигине ылайык таап олтурам. Менин илгери үмүтүмдү сөзсүз актап, эч уят кылбастан, эли-журтубуз үчүн ак кызмат кылып бериңиз?!?” деп чоң жоопкерчиликти мойнума жүктөп таштады. Сиздер жанагинтип күмөн санагандай, ортого тааныш-тунуштарымды деле салбадым. Менин эзели мындай ит адатым жок, Алишер мырза!

• Баса, өтө кыйын кезеңде акимдик орунга олтургузушту.

Экономикасы сызга белчесинен баткан тоолуу Ала районун мындан ары кантип жана кандай жол менен туташ кризистен куткарып, андан ары өнүктүрмөкчүсүз?

• Районубуз беделдүү бейөкмөт уюмдардан кур эмес. Дал ошолор

аркылуу Эл аралык донор уюмдар  менен алакабызга чыйыр салып, мамилебизди ыраса күчөттүк. Адегенде моминтип улан-кыздарыбызды атайын Ош шаарына алып келип, спорт менен тегиз машыктырып, бир катар мелдештерге дагы активдүү катыштырып жатабыз.

         Буга улай бал өндүрүү, малдарды бордоп ирдентүү, жайлоо жана альпинизм туризми, Улуттук оюндарды жандандыруу аркеттерибиз абдан күч! Мындай далбасабыз бара-бара үзүрүн берип, районубуздун жана жергиликтүү калктын үй-бүлөлүк бюджетин арттырууга гана туруктуу өбөлгө жаратаары шексиз!

• Оптималдаштыруу саясатына, маселен, бири-бирин кайталаган

түзүмдөрдү, ошондой эле Алай менен Чоң-Алай райондорун бириктирүү демилгесине Сиз кошуласызбы?

• Президентибиз Садыр Жапаровдун оптималдаштыруу демилгеси,  

буюрса, калайык-калкыбыз тарабынан жапырт колдоо табаарына жана бара-бара ийгиликтүү гана жүзөгө ашаарына менен бөркүмдөй ишенем! Анткени, Кыргызстан дал ушул тапта ирилештирүүгө өтө эле муктаж! Мындайда жеке кызыкчылыктардын өз ара кагылышынан коркуп-үркүүнүн эч кандай кажети жок! Танып не. Жергебизде трайбализм, ээн баштык, ээн ооздук жана демократияга жамынган плюрализм балакети дагыле күч!  

• Тоолуу Алай аймагын ар тараптуу оожалтууда эң ириде кайсыл

өңүткө катуу басым жасамакчысыз?

• Өрөөнүбүздүн болочогу мал жана айыл чарбасы менен  абдан тыгыз

байланышкан десем эч жаңылышпаймын. Бирок, бул тармактарга деле жалаң кесипкөйлөрдү арбыныраак тартуубуз  кажет! Айрыкча жаштарды. Антпесек, булар качанкыга дейре чет өлкөлөрдө тентип, кор болуп гана жүрүшөт? Мекенибизге тегиз кайтышсын! Кыргызстан үчүн деле кызмат кылышсын, эй!

• Алтынбек мырза, генерал болууну эңсебеген жоокер болчу беле.

Анын сыңарындай, жапжаш экенсиз, болочокто Сиздин деле Өкмөт башчысы, же Президент болоюн деген изги тилегиңиз бардыр?

• Куп жарга такадыңыз да. Аман турсак, пешенеге жазганды көрөбүз

го. Бирок, азыр жамбаштап жатчу кез эмес! Аракет кылсаң, анын сөзсүз берекети болоору шексиз. Балким, мага деле тагдыр жылдардын бир жылдарында Премьер-министрликти, же  Президенттикти буюруп калаар… Кыскасы, бардыгын турмуш өзү көрсөтөт эмеспи.

Алишер ТОКСОНБАЕВ “АЙМАК”