801 Бардыгы /

 БАТКЕН. Баткен облусунун Кадамжай шаарында Кыргыз Өкмөтүнүн Баткен облусундагы ыйгарым укуктуу Өкүлүнүн орун басары Эрлан Сапарбаев баштаган жергиликтүү бийлик өкүлдөрү Өзбек Республикасынын Фергана облусунун башчысынын орун басары Мухсинхужа Абдурахманов жетектеген делегация менен жолугушту. Эки тараптуу кездешүүгө  аталган аталган облустардын бир катар ишкерлери дагы катышышты.

         Адегенде тараптар Баткен жана Фергана облустарынын ортосундагы соода-экономикалык, инвестициялык жана маданий байланыштарды чыңдоо, эки элдин ынтымагын, карым-катнашын мындан ары бекемдөө жаатындагы өз ара  кызматташуу пландарын кең-кесири талкуулашты. Фергана облусунун делегациясы агрардык аймак катары саналган Баткен облусунун айыл чарба продукцияларын Фергана облусуна туруктуу экспорттоого кызыкдар экендигин кыйытышты. Өзгөчө  Кадамжай районунан малина менен гиластын чоң көлөмүн алуу мүмкүнчүлүктөрү бар экендигин баса белгилешти. Ошондой эле туризмди өнүктүрүү боюнча бир катар сунуш-пикирлер дагы айтылды. Маселен, Баткен облусундагы Өзбекстандын Шахимардан жана Баткен облусунун Дугаба эс алуу жайларына эс алуучуларды байма-бай тартуу, муну үчүн чек ара автожол көзөмөлдөп-өткөрүү бекеттеринде эки мамлекеттин жарандарынын өтүүсүн өтө жөнөкөйлөштүрүү маселеси дагы үстөккө-босток көтөрүлдү.

Ишкерлер айыл чарба продукциялары менен катар кен байлыктарын кайра иштетүү эки тараптуу кызматташуунун артыкчылыктуу багыттары экендигин деле жашырышкан жок. Ошондой эле биргелешкен медициналык мекемелерди, медициналык каражаттарды жана шаймандарды чыгаруучу ишканаларды ачуу жаатында дагы мүмкүнчүлүктөрдү орой-чарай талкуулашты. Эрлан Сапарбаев менен Мухсинхужа Абдурахманов өз  кызматташууда ар бир тармак боюнча облуста атайын жооптуу адистерди дайындоо,  конкреттүү жана расмий сунуштар менен алмашуу, тийиштүү обьекттерди жеринде көрүү менен кызматташууну токтоосуз жолго салууда өз ара активдүү иш аракеттерди жүзөгө ашырууну ачык-айкын сүйлөшүштү. Эң негизгиси эки тараптуу кызматташууну мындан ары ийгиликтүү илгерилетүү максатында Баткен жана Фергана облустарында соода-экономикалык маселелер боюнча иш алып бара турган туруктуу Өкүлчүлүктөрдү ачуу жаатын катуу макулдашышты. 

Белгилей кетчү жагдай: буга чейин ушул жылдын 11-12-мартында Кыргызстан менен Өзбекстандын өлкө башчылары Ташкент шаарында расмий жолугушуп, анда эки мамлекеттин  кызматташуусун жаңы сапаттык денгээлин түптөө максатында 22 документке кол коюлган. Жолугушууда Баткен облусунун башчысы Өмүрбек Суваналиев менен Өзбекстан

Республикасынын Фергана облусунун башчысы Хайрулло Бозаров дагы кызматташуу жаатында 22 беренеден турган эки облустун бирдиктүү жол картасына кол коюшкан. 

Алишер ТОКСОНБАЕВ “АЙМАК”