969 Бардыгы /

ОШ. Кара-Кулжа районунда туруктуу мал уурулук менен алектенген адамдардын кылмыштуу тобу кармалды. Бул тууралуу Ош облустук ички иштер башкармалыгынан билдиришти.

Маалыматка таянсак, милицияга 2021-жылдын 6-мартында Кара-Кулжа районунун Кара-Кочкор айылынын 58 жаштагы тургуну Т.А. арыз менен кайрылып, 5-мартта алты жашар бээсин талаадан эле уурдатып ийгендигин билдирген. Арыз Кара-Кулжа РИИБсы тарабынан Кылмыштардын жана Жоруктардын бирдиктүү реестрине катталып, тергөөнүн жүрүшүндө мал уурулук фактысы боюнча бир нече жолу кылмыш жоопкерчилигине тартылган Кара-Кулжа районунун Чалма айыл аймагына караштуу Токбай-Талаа айылынын 30 жаштагы тургуну Ж.у.Э. шектүү катары кармалып, Кара-Кулжа райондук ички иштер бөлүмүнүн убактылуу кармоочу жайына киргизилди.

Адепки сурак учурунда Кара-Кулжа районунун Ылай-Талаа айыл аймагынын Сай айылынан дагы бир баш жылкы уурдаганы афкыгдалды. Бул факт Кара-Кулжа РИИБсы тарабынан Кылмыштардын жана Жоруктардын бирдиктүү реестрине катталып, жогорудагы кылмыштарды өзү жалгыз эмес, өзүнүн шериктеши — Өзгөн районунун Куршаб айылынын 27 жаштагы тургуну Т.к.А. (аял киши) менен бирге жасагандыгы ачыкталды. Шектүү Т.к.А. Өзгөн райондук ички иштер бөлүмүнүн убактылуу кармоочу жайына киргизилип, тергөө амалдары уланып жатат.

Алишер ТОКСОНБАЕВ “АЙМАК”