1,527 Бардыгы /

БАТКЕН. Бүгүнкү күнгө Тажикстанда кармалып турушкан он эки Кыргыз жараны акыры Мекенине кайтарылды. Буга чейин Тажик Республикасынын чек арасын мыйзамсыз басып өтүүгө айыпталып, Тажикстандын мамлекеттик укук коргооо органдары тарабынан  кармалган Баткен облусунун  беш жараны, Ош облусунун эки тургуну Кыргызстанга кайтарылды.. Ошондой эле  буга дейре Бишкек шаарынын эки тургуну дагы бошотулган. Жарандардын мал-мүлкү, унаалары толугу менен ээлерине кайтарылды.

Кыргызстандын кармалган жарандары Тажикстандын соту тарабынан соттолуп, аталган мамлекеттин мыйзамы боюнча айып пул салынып, сот залынан дароо эркиндикке кое берилди. Белгилей кетчү жагдай: үстүбүздөгү жылдын 23-февраль күнү Тажикстандын  аймагынан кармалган  Лейлек районунун жергиликтүү  үч тургуну Кыргыз Өкмөтүнүн Баткен облусундагы  ыйгарым укуктуу Өкүлү Өмүрбек Суваналиев менен Тажик Республикасынын Согди облусунун аткаруу бийлигинин төрагасы Раджоббой Ахмадзоданын тынымсыз сүйлөшүүлөрүнүн натыйжасында Кыргызстанга кайтарылды. Анткени, алар Тажиксандын аймагынан эмес, мамлекеттик чек ара сызыгынан кармалган үчүн эскертүү гана берилген.

         Ушул тапта чек арадан өтүү эрежелери боюнча телекөрсөтүү, үналгы, гезит, социалдык тармактар аркылуу маалыматтар берилип, облустун чек аралаш аймактарында акимдер, Айыл Өкмөт башчылары эл менен тынымсыз жолугушуп, калк арасында түшүндүрүү иштери катуу жүрүп жатат. Тийиштүү жерлерге атайын белгилер дагы орнотулду.

Кыргызстандын  Баткен жана Тажикстандын Согди облустарынын чектеш аймактарында орун алган бул маселелерди биржаңсыл чечүү максатында Кыргыз Өкмөтүнүн Баткен облусундагы  ыйгарым укуктуу Өкүлү Өмүрбек Суваналиев менен Тажик Республикасынын Согди облусунун аткаруу бийлигинин төрагасы Раджоббой Ахмадзода атайын жолугушуп, эки облустун чек аралаш аймакта жашаган элинин суранычы боюнча таажы илдетинен улам жабылган Лейлек районундагы “Кулунду” жана “Кайрагач” чек ара көзөмөл өткөрүү бекеттерин биротло ачуу маселесин дагы өз ара сүйлөшүштү.

Айтмакчы, ушул тапта Кыргызстандын чек арасын мыйзамсыз басып өтүү    боюнча айыпталып, Тажикстандын он беш жараны эки айга камака алынган. Алар дагы Кыргызстандын мыйзамы боюнча жооп берет. Андан соң гана Мекенине кайтарылат.

Алишер ТОКСОНБАЕВ “АЙМАК”