825 Бардыгы /

БИШКЕК. АКШнын Эл аралык өнүктүрүү боюнча Агенттиги (USAID) Кыргыз Республикасынын саламаттыкты сактоо министрлигинин алдындагы Улуттук фтизиатрия борборун 24 миллион сомдук медициналык керебеттер менен камсыз кылууга жардамдашты. Медициналык мекемеге тапшырылган 78 заманбап керебет аталган борбордо көптөгөн жумалар жана айлар бою кургак учукту дарылоого мажбур болгон бейтаптар үчүн гана ылайыкташтырылган. Бул заманбап жабдууну Кыргыз Республикасына АКШдан жеткирүүнү USAIDдин «Кургак учукту айыктыруу» долбоору америкалык Project C.U.R.E. уюму менен биргеликте уюштурду.

Медициналык жабдуулар Улуттук фтизиатрия борборунун реанимациялык жана башка бөлүмдөрүндө дароо орнотулду. Керебеттер орнотуу жана пайдалануу үчүн ыңгайлуу, бейтаптардын коопсуздугун камсыз кылуу жана дарылоону жеңилдетүү үчүн атайын функциялары дагы бар.

• Ошентип, жапжаңы заманбап керебеттер кургак учук менен

ооругандардын стационарда узак жана оор дарылануудан өтүүнү кыйла жеңилдетүүгө көмөктөшөт, – дейт Кыргыз Республикасынын саламаттыкты сактоо министрлигинин алдындагы Улуттук фтизиатрия борборунун башчысы Болот Майканаев.

Көп учурда кургак учукка чалдыккан бейтаптардан ооруканада дарылануусу талап кылынат. Ооруну жуктурбастыгы аныкталгандан кийин дарыланууну андан ары үйдөн улантуу мүмкүнчүлүгүнө ээ болушат. Оорлошкон учурларда, же бейтаптар хирургиялык кийлигишүүгө дуушар болгондо, алар ооруканада бир нече айга чейин жатып дарыланышы толук ыктымал.

• Бул керебеттер мурдагылардан кыйла жакшыраак. Аны отуруп

дагы, жатып дагы жөндөп өзүңө гана ыкчам ыйгайлаштырып алсаң болот. Эми аркам оорубай, уйкумду кандырып, тыптынч уктап калдым. Бул бейтаптар үчүн атайын иштелип чыккан жабдык экен, – дейт аталган борбордун аты-жөнүн атоодон тайсалдаган туруктуу сыркоолорунун бири.

USAID – кургак учукка каршы күрөшүү боюнча Кыргызстандын көп жылдык өнөктөшү. Азыркы учурда, USAID«Кургак учукту айыктыруу» беш жылдык долбоорун JSI Research & Training Institute, Inc. (JSI) уюму менен өнөктөштүктө ишке ашырып жатат. Жалпы бюджети 18,5 миллион АКШ долларын түзгөн долбоор Кыргызстанда кургак учукту аныктоо ишин күчөтүү жана дары-дармектерге таңкыстыкты жоюп, кургак учукту дарылоону жакшыртууга ганабагытталган. Project C.U.R.E. — бул дүйнө жүзү боюнча медициналык буюмдарды жайылтуу менен алектенген гуманитардык уюм.

Айтмакчы, Улуттук фтизиатрия борбору – Кыргыз Республикасындагы кургак учукту дарылоо боюнча негизги жана эң ири оорукана. Борбордо 350 бейтап жайгаша алат. Жыл сайын бул жерде 2,2 миң адам дарыланат. Кыргызстанда кургак учукту дарылоо дээрлик акысыз.

Алишер ТОКСОНБАЕВ “АЙМАК”