1,566 Бардыгы /

  БАТКЕН. Баткен облусунда акимдерди жана алардын орун басарларын кайра баалоонун жыйынтыгында Баткен районунун акими Акылбек Орозов 60 суроонун 29уна туура жооп берип, экинчи турга өтпөй калды. Ал эми анын биринчи орун басары Адылбек Набиев, экинчи орун басары Кишимжан Кыдырова дагы кийинки баскычка араң өтүштү.

Айтмакчы, Кадамжай районунун акиминин биринчи орун басары –  акимдин милдетин аткаруучу Абдыманнап Жакпаров аттестациядан өтүүдөн баш тартты. Ал эми акимдин экинчи орун басары Мээринса Асанова экинчи турга араң өттү. Лейлек районунун акими Бекмурат Баймуратов биринчи баскычтан өтүп, экинчисинен кулап калды. А анын биринчи орун басары Абдирашит Ташбалтаев, экинчи орун басары Максатай Керимбердиева экинчи турга зорго өтүштү.

Баткен облусунда үч район бар. Үчүнчүсү – Кадамжай районунда акимдин кызмат орду дагыле бош турат. Мамлекеттик кадр кызматынын төрагасы Абдырахман Маматалиев жетекчилик кылган комиссия акимдер жана анын орун басарлары жөнүндө Кыргыз Өкмөтүнүн Баткен облусундагы  ыйгарым укуктуу Өкүлүнөн, милициядан, атайын кызматтан жана жарандык коомдон алынган маалыматтар менен кенен-чононтаанышып, маектешүү дагы өткөрүп жатышат. Буга дейре акимдер район жетекчилерине тиешелүү мыйзамдар камтылган тест дагы тапшырат. 2016-жылы өзгөргөн Баш мыйзамга ылайык акимдерди тандоо, дайындоо жана кызматтан бошотуу укугу Өкмөт башчыга берилген.

Алишер ТОКСОНБАЕВ “АЙМАК”