2,436 Бардыгы /

БИШКЕК. Кыргызстандын түштүк аймактарында кадимкидей сел жүрүшү толук ыктымал. Бул жөнүндө Кыргызгидромет борборунан кабарлашты.

Маалыматка караганда, бүгүн, 6-апрелде нөшөрлүү жаан-чачынга байланыштуу республиканын тоо этектериндеги аймактарынын төмөн жерлерин суу капташы толук мүмкүн. А түгүл дарыяларда суунун деңгээли дагы көтөрүлүшү сөзсүз күтүлөт.

Мындан тышкары Ош, Жалал-Абад жана Баткен облустарынын тоолуу жана тоо этектериндеги райондорунда катуу сел жүрүшү мүмкүн.

ТООЛУУ РАЙОНДОРДО КАР КӨЧКҮ ЖҮРӨТ

БИШКЕК. Кыргызстандын тоолуу райондорунда кар көчкү жүрүшү күтүлөт. Бул туурасында Кыргызгидромет борборунан кабарлашты.

Маалыматка таянсак, ушул жылдын 6-апрелинен 9-апрелине дейре тынымсыз жааган жаан-чачынга жана абанын темпратурасынын жогорулашына байланыштуу Кыргызстандын тоолуу райондорунда, Бишкек-Ош автоунаа жолунун 121-138 (Төө-Ашуу ашуусу), 198-255 (Ала-Бел ашуусу, Чычкан капчыгайы), Суусамыр-Талас-Тараз автоунаа жолунун 1-14 (Өтмөк ашуусу), Ала-Бука-Жаңыбазар-Кировка автоунаа жолунун 71-75 (Чапчыма ашуусу), 200-215 (Каракысмак капчыгайы, Кара-Буура ашуусу), Мырза-Аке-Кара-Кулжа-Алайкуу автоунаа жолунун 74-110, Бишкек-Нарын-Торугарт автоунаа жолунун 286-306 (Долон ашуусу, Кара-Үнкүр капчыгайы), Казарман-Актал-Чат автоунаа жолунун 67-93 (Кара-Гөө ашуусу), Ош-Сары-Таш автоунаа жолунун 161-179 (Талдык ашуусу), Сары-Таш-Дароот-Коргон-Кара-Мык автоунаа жолунун 97-98, 110, 136-150 жана Каракол-Эңилчек автоунаа жолунун 76-90-чакырымдарында (Чоң-Ашуу ашуусу) кар көчкү түшүүcү жана кар күрткүсү күтүлөт, жолдор тайгак болуп, а түгүл муз дагы тоңот.

Ошондуктан автоунаалардын ортосундагы 500 метр аралык кыймыл сөзсүз сакталашы зарыл.

Алишер ТОКСОНБАЕВ, өз кабарчы