1,617 Бардыгы /

БАТКЕН. Баткен облусунда аткезчилик жүк кармалды. Бул жөнүндө у Улуттук коопсуздук мамлекеттик комитетинин басма сөз кызматынан билдиришти.

Маалыматка караганда, кечээ, 5-апрелде Кыргыз Республикасынын  Кылмыш-Жаза кодексинин 358-беренесинин 1-бөлүмү (Мамлекеттик чек арадан мыйзамсыз өтүү) боюнча кылмыштардын жана жоруктардын бирдиктүү реестрине катталган сотко чейинки өндүрүш ишинин алкагында, Баткен райондук сотунун сакциясына ылайык, Жаңы-Жер чек ара заставасынын жана УКМКнын чек ара кызматкерлери тарабынан Лейлек районунда жайгашкан “Партнер Нефть” май куюучу жайынын кампасына атайын тинтүү жүргүзүлдү.

Аталган кампанын аймагына тинтүү иштеринин жүрүшүндө «Opel Zafira» үлгүсүндөгү жеңил унаа кармалып, анын салонунан жалпы көлөмү 900 литрлик цистерна табылган. Кармалган унаа Кыргыз Республикасынын  УКМКсынын Чек ара кызматынын «Кайрагач» өткөрүү бекетинин аскер кызматкерлерине жеткирилип, сактоого өткөрүлүп берилди.

Ушул тапта УКМК тарабынан бул иштин фактылык жагдайларын жана бул жорукка катышкан адамдарды аныктоого багытталган ыкчам-тергөө иш-чаралары кызуу  улантылууда.

Алишер ТОКСОНБАЕВ, өз кабарчы