1,578 Бардыгы /

 БАТКЕН. Кыргыз Өкмөтүнүн Баткен облусундагы ыйгарым укуктуу Өкүлү Өмүрбек Субаналиев Баткен районунун Сай айылынын эли менен жолугушту. Айыл тургундарына адегенде Кыргыз Өкмөтүнүн чек араны делимитациялоо жана демаркациялоо боюнча комиссиянын мүчөсү Алишер Эргешов  Чек араны тактоо иштеринин жүрүшү жана акыркы каралып жаткан чечимдер тууралуу кеңири  түшүндүрмө жасады.

Андан соң  жергиликтүү тургандар Чек араны тактоо жумуштары боюнча бир катар сунуш-пикирлерин айтышты. Ошондой эле демаркация иштеринин жүрүшүнө чукул көңүл буруу зарылдыгын дагы баса белгилешти. Сай айылынын эли чек ара маселесин чечүүдө жергиликтүү калктын ой-пикирин эске алуу, аймактын чек арасын жакшы билген жарандарды чек араны тактоо боюнча Өкмөттүк комиссияга кошуу боюнча Баткен облус башчысынан абдан катуу  суранышты. 

Аталган жыйында Кыргыз Өкмөтүнүн Баткен облусундагы ыйгарым укуктуу Өмүлү Өмүрбек Субаналиевге  чек ара айылынын социалдык абалы, инфратүзүмү боюнча бир катар суроолор дагы узатылды.  Жыйынтыгында Баткен облусунун жетекчиси аталган айылдын электр энергиясынын кубаттуулугунун сапатын жогорулатуу, эскилиги жеткен электр мамычаларын чукул арада алмаштыруу, сел коргоо тосмолорун курууну жүзөгө ашыруу, Сай айылын Кадамжай району менен байланыштырган ички төрт чакырым жолду баланска алуу, аны оңдоп-түзөө, айылдын босогосундагы чек ара көзөмөлдөп-өткөрүү бекеттериндеги ыксыз текшерүүлөрдү жеңилдетүү  туурасында жолугушууга катышкан  аймактык жетекчилерге жеринде тапшырмаларды берди.  Ошондой эле сөз арасында  айылга салынып жаткан 2014-жылы башталган типтүү мектептин курулушунун каржы маселеси чечилгендиги, бул агартуу мекемеси жаңы окуу жылында пайдаланууга тапшырылаары айтылды.

Баткен облусунун башчысы Өмүрбек Субаналиев эл менен бул сапар жолугушуусунда Баткен облусуна өзгөчө макам берүү маселеси абдан катуу каралып жаткандыгын, алдыда  чек аралаш аймактагы элдин жашоо-шартын жакшыртуу, аймактын инфратүзүмүн ого бетер чыңдоо жаатында пландуу жумуштар жүзөгө ашырылаарын убадалады. Ошону менен катар кошуна мамлекеттер менен ар тараптуу кызматташуу жаатында алгылыктуу иш-аракеттер жүзөгө ашырылып жаткандыгын, кошуналар менен ынтымакта жашап, тыгыз карым катнашты улантуу учур талабы экендигин моюндады.

Баткен районунун Сай айылы Өзбекстан Республикасынын Сох району менен чектеш жайгашкан. Айылда 2300дөн ашуун эл жашайт.

Алишер ТОКСОНБАЕВ “АЙМАК”